Peter Ondume yomomufitu: Oku kala kwetu momikunda

0
253
Peter Jungle Fighter

Sho kwa luudha otwi inyenge okuza pehala mpoka twa li noku ya mokati komukunda Eendobe moka twa li pethimbo ndyoka. Otwe shi ningi opo shikale oshipu kaakalimo yomomukunda ya vule oku ya koshigongi shelongo lyopapolitika. Ongulohi ndjoka omwedhi ogwa li gwa toka nawa onkene otwa li tatu vulu okumona nawa kehe shoka tashi inyenge mehala ndyoka okuza mpoka twa li tatu ningile oshigongi. Aakalimo yomomukunda nguka oye ya koshigongi momwaalu omunene okupulakena ketumwalaka tali popi omalunduluko monkalo yoshilongo shawo. Ishewe mbaka oye tu etele iikulya nomeya opo tu vule okwiiyoga omanga inaatu tameka oshigongi.Hailwa Sacky oye a li, iindilwa okupopitha oshigwana tango  omanga ngame inaandi shi popitha wo. Okwa li iindile ayehe mboka yi ile poshigongi opo ya pulakene nawa kwaashoka a li teya lombwele opo yo ya ka hokololele nawa aakwashigwana ooyakwawo mboka inaa ya thika koshigongi, etumwalaka ndyoka.

Hailwa Sacky okwa fatulula kutya tse otwa li tatu kondjithile shike aakwiita yomukolonyeki. Okwa tsikile noku fatulula kutya oSWAPO omolwashike ya li ya dhikwapo, ta lombwele aanamukunda kutya tse aakwiita oshike twa pumbwa  okuza kuyo. Kutya otwa pumbwa uuyelele kombinga yomainyengo gomutondi oshowo  uuyelele kombinga yaamboka ya li taya longele kumwe nomutondi momukunda ngoka. Okwe ya tseyithile, wo kutya otwa pumbwa okutelekelwa iikulya kuyo oshowo okupewa omakwatho agehe ngoka twa pumbwa.Hailwa Sacky okwa londodha aakwashigwana kutya ngoka ta ka uvika ta longele kumwe naakwiita yomutondi ota ka geelwa negeelo lyaanohenda.

Epopitho lyetu olya kwata konyala uule wootundi mbali opo ihe konima yaashika Kommanda okwa mono ompito oku tya sha paufupi oshowo okungonga ashihe shoka sha popiwa. Konima yaashika aanamukunda oya li ya pewa ompito opo ya pule omapulo. Molwashoka oyendji yomaakalimo oya li opo yetu  mono lwotango , mbaka oya li yena uutile nuumbanda onkene inaa pula omapulo ogendji. Omolwashika otwa tokola kutya aakwashigwana mboka ya li ye na omapulo otaya vulu oku ga pula pethimbo twa li tatu popithathana nokutseyathana molupe lwaashi lwopambelewa. Manga aakwashigwana ya li taya popitha aakwiita yamwe, aakwiita ooyakwawo oya li taya imbi omaimbilo ngoka taga popi ombepo yelunduluko.

Omaimbilo oga imbwa nelalakano okunyanyudha aakwashigwana oshowo okunkondopeka elongo lyopapolitika ndyoka twali twa gandja. Potundi onti 23h00 otwa yi tu kalale. Konima sho aakwashigwana ya shuna komagumbo gawo, tse otwa yi miihwa oku ka lala. Otwa ende konyala oshinano shookilometa mbali tuuka mUumbangalantu mokuti moka twa yungu ontanda yetu konyala twa ninga ongonga twa taalela kombinga ndjoka twa ziilile.Atuhe otwa li twa nayanyukwa  komukalo ngoka aakwashigwana yetu taamba noshikwawo enyanyu lyetu olya li enene molweuvaneko ndyoka yetu pe kutya otaya ka longela kumwe natse moku kondjitha omatanga gomukolonyeki.

Ongula otwa penduka lwopotundi onti-5h00 naasho etango lya piti tse otwa tsikile olweendo lwetu okuya komukunda Okawe guli konyala oshinano shookilometa 17 kUumbugantu-ninginino womukunda Eendobe.

Okawe otwe ka ziilile mUumbangalantu.Omanga inaa tu thika momukunda ngoka aakwiita yaali oya tumwa  momagumbo ngoka ge li popepi okukonga uuyelele kombinga yomainyengo gaakwiita yomukolonyeki. Oondaadhi ndhika odha lombwelwa kutya aakwiita yomukolonyeki oya li ya talelepo omukunda ngoka konima yomasiku gaali ga pitipo.Mbaka oya li wo ya etelele eindilo okuza kaakwashigwana momukunda ngoka kutya otwa pumbwa okulunduluka po pehala mpoka twa thikile. Oshoka ndyoka olyo anuwa hali longithwa kaakwiita yomukolonyeki onkene tse otwa pumbwa oku inyenga tu ye kUuzilo  womukunda ngoka konyala ookilometa oofupi dhowala  okuza pegumbo lyaTate Epafulas.Ehala ndika olya li lina omuthitu gwa thita nawa naa ngoka ogwa li gwoopalela aakwiita yoguerrilla.Konima yoku lundulula ehala mpoka twa li, Kommanda okwa li  a tumu aakwiita yaali ya ka talelepo omagumbo gaali oku ka konga iikulya.

Otwa li wo twa tokola opo tu kale pehala ndyoka uusiku mboka okupa aakalimo yomomukunda ngoka elongo lyopapolitika,ngaashi twe shi ningi momikunda dhilwe moka twa piti nkene tuu tweya moNamibia. Omanga tu li momukunda ngoka otwa li tu uvu  omidhumo  dhiiyenditho, mbyoka tashi vulika ya li yaakwiita yomukolonyeki South Africa, ngiika ta yi inyenge mokamba yaakwiita yomutondi gwetu mOkongo. Omidhumo ndhika odha li dhi tu uvitithe nayi nodhe tu kaleke twaa uvite nawa.

Okongo oyi li konyala ookilometa omilongo 40 kUumbugantu wOkawe.

Sho esiku lyeende tali toko otwa mono kutya tse otwa li oshinano shookilometa 40 okuza kokamba yomutondi gwetu, onkene otwa li tuna okukala twiilongekidha pamadhiladhilo oku idhidhimikila omainyengo gomutondi ngaka. Oonkondo nomukumo gwetu ogwa li gwa kankamekelwa keitaalo kutya tse otwa li tatu kondjo iita iiyapuki, molwashoka otwa li tatu kondjele shoka shetu yene. Otwa li lela twa lungundja pethimbo twali pomukunda ngoka Okawe oshoka ka twa li tu shi kutya oolye mokati kaakwashigwana yomomukunda ngoka ya li haya longele kumwe naakwiita yomukolonyeki. Shimwe ishewe otwa li nomaipulo kutya otashi vulika aakwiita yomukolonyeki yokolupadhi ya li ya helulilwa popepi nomukunda nguka no pwaana ngoka eya mono. Onkene Hailwa gwetu gumwe okwa li a lombwelwa a londe komuti oku shiika nokutala omainyengo gaakolonyeki kokule oshikwawo aakwiita yaali oya li ya tumwa kokule kashona naampoka twa li oku tu londodha uuna aakwiita yomutondi taya hedha popepi natse.

LEAVE A REPLY

Please enter your comment!
Please enter your name here