Ya tegelela nondjuulukwe okonserta ya Trey Songz

0
266

WINDHOKE – Enyanyu olili pombanda notali tsikile okuya muule okuza tuu sho kwa tseyithwa kutya omuhikingalo omukwashigwana gwAmerica oteya okuimba moNamibia omwedhi nguka.

Ngashingeyi okuna ashike omasiku inaaga adha pomulongo opo omuimbi gwoongalo dholudhi lwoR&B/Hip Hop, Trey Songz a thike mevi lyOmapendafule. Omolwashika aaholi yoongalo dhe oyendji oya nyanyukwa no ye wete ethimbo itaali thiki mbala opo ya ka mone omwiimbi gwawo kolutu ta imbi oongalo ndhoka yo ye hole mokonserta ndjoka ya kwashilipalekwa ku MTC kohi yedhina “MTC Trey Songz live in concert.”

Etegelelo lyokonserta ndjika olya towalekwa ishewe shono kwa tseyithwa kutya aahikingalo yomegumbo ngaashi mboka yoo Lil D, Kalux, Gazza na Oteya, otaya ka kala oshitopolwa shoku hika oongalo dhawo petameko lyokonserta ndjika.

Aaholi yomusika noongalo oya holola omaiyuvo gawo kombinga yokonserta ndjika unene tuu sho ndjika tashi vulika ashike tayi ningwa lumwe monkalamwenyo yawo onkene yo oya hala noku halelela opo ya kale pokonserta ndjika oku tala nokuuva nkene omuhikingalo ngoka yehole ta hiki noku imba oongalo ndhoka yo ye hole unene.

Yalwe oya ti okutsakaneka “Mr Steal Your Girl” osho ondjodhi yawo ya ningi yoshili, onkene itaya vulu nando oku etha ompito ndjika yi ya pitililepo. Unene tuu sho taya ka mona omuhikingalo gwawo ngoka ye hole tiimbi komeho gawo noshowo taya vulu oku mu guma ngele andola oya pitikwe oku shi ninga.

“Ngame ogumwe gwaamboka ye mu hole. Onda kala noku pulakena oongalo nomusika ye  okuza nale no itandi dhimbulukwa uuna nda tamekele oku yi pulakena na ohandi pulakene oongalo dhe sigo okesiku ndika.Onde mu mwene ashike omathimbo gapiti sho a li ta hiki oongalo dhe koTiivii oshowo moInterneta, ihe oshiwike tashiya otandi ka mona ompito oku mu mona momwenyo eli komeho gandje ta dhana nokuhika oongalo nde mu tala, ndjika ompito ombwaanawa ndjoka ngame inaandi hala yi pitilile ndje po.Omusika ye otayi ihokolola yoyene na otandi vulu oku mu hokolola momikalo odhindji,’ osho Jessy Beukes a popi kombinga ya Trey Songz.

Omuholi gwomusika gumwe ishewe, David Josef okwa ti nonando ha ye naanaa ehole oongalo dha Trey ndjika oyo ompito ye yotango okumona omukwashigwana gwaAmerica omusimani ngoka a sindana omapapa gomusiki ta hiki noku imba moNamibia eli komeho goshigwana oshiholi shomusiki. Onkene okwa hala okuuva noku tala nkene shika tashi kala uuna omunuunongo miihikomwa gwopaigwana ta imbi nokudhana moshilongo.
Josef okwa ti aahikingalo oyendji yopaigwana  Aamerica oha ya ka dhana oongalo dhawo olundji koSouth Africa hoka haya hiywa ya ka dhane.
“Onda landa nale okatekete kandje na otandi yi ko konserta ndjika.Okonserta ngaashi ndjika ohayi ningwa ashike mo South Africa nolundji ohatu kala twa kumwa kutya omolwashike Namibia ihaa ithana aahikingalo ngaambaka opo ye, ya imbe nokudhana oongalo dhawo muka.Ndjika otashi vulika yi kale ompito yotango oshowo ya hugunina okumona Trey moNamibia, naashika mushoshene oshinima oshiwanawa, omuntu wu kale inoo shi palutha, kutya nee ngoye ku hole oongalo dhe,”

Omuhikingalo ngoka a pewa epapa mokuhika oongalo dho Afro-Pop no R&B, Kalux okwa shambulwa kokonserta ndjika a ti “Ngame onda nyanyukwa no itandi vulu okutegelela. Eiyuvo ewanawa lya pitilila onkene aaholi yomusika otaya tegelele sha oshiwanawa”.

Okonserta oya thanekwa okukalako mOlyomakaya yomasiku omilongo 30 ga Mai nuumvo pokapale kuudhano wetanga lyokoompadhi ka Sam Nujoma Stadium moKatutura sha Venduka.

Ongaloyimwe yaTrey Songz, oya tulwa methigathano lyokupewa epapa lyoGrammy. Nguka edhina lye lyolela ohiithanwa Tremaine Aldon Neverson omuhikingalo omuAmerica ye ishewe omushangi gwoongalo, omuimbi mokuiitanga, omunduluki gwoongalo oshowo omudhani mookino noofilima. Okwiimonene oshilukadhina ‘Mr Steal Your Girl’ okuza mongalo ye moalbuma ontihamano yedhina Trigga.

Oalbuma ndjika ya Trey Songz yedhina Trigga okwa li ya tseyithwa omumvogu momwedhi Juli na oya li  ya kala pehala lyotango momusholondondo gwoongalo hadhi dhanwa moUS Billboard 200 , na oya landithile ookopi dhili omayovi 105,000 moshiwike shotango sho ndjika ya tulwa momalanditho.Ongundu yokuhika oongalo yi na edhina li shiwike ya za koSouth Africa ha yi ithanwa Stimela na yo otayi ka dhana pethimbo lyokonserta ya Trey Songz ehuliloshiwike ndyoka.

Omiyelo okuya mokonserta ndjika otadhi keeguluka  potundi 16h00  komatango gOlyomakaya ndjoka omanga okwiimba kwotango otaku tameke potundi 18h00.

Uutikete waasimanekwa otawu gu oodola 800 mwakwatelwa okunwa, okulya oshowo oshipundi shokomeho, uutekete wo Golden Circle otawu landwa koo N$450 omanga mboka womuntu kehe otawu landwa kooN$150.

LEAVE A REPLY

Please enter your comment!
Please enter your name here