Armas Amukwiyu Marathon oyili ko omwedhi tu uka

0
438

ONGWEDIVA-Uudhano wokumatuka oshinano shookilometa odhindji wotango tau kala hau ithanwa Armas Amukwiyu Marathon Challenge otau ka kalako momasiku gahamano gomwedhi tuuka.

Uudhano mbuka otawu ka tondokwa pokati kOnyaanya nOmuthiya moshitopolwa Oshikoto.

Amukwiyu oye omukwatakanithi gwongundu Swapo moshitopolwa shaShikoto.

Omulongekidhi guudhano mbuka omutondoki gwiinano iile gwaNamibia Gabriel Simon Shokonawa, okwa ti Amukwiyu oye omukwashilipaleki guudhano mbuka omupe ye oye ishewe kuume omunene gwenongelo lyuudhano wokumatuka lyedhina Shokonawa Marathon Academy.

Okwa ti omukwatakanithi gwoSwapo modistrika ya Niipa Jerry Ngwena oye amushanga omupe gwa Shokonawa Marathon Academy.

Aanambelewa mbaka yaali yoSwapo oya li ya pewa iinakugwanithwa  mbika pethimbo lyoshigongi shewiliko sha Shokonawa Marathon Academy, sha li moVenduka iiwike ya piti. Amukwiyu moku taamba oshinakugwanithwa shika okwa ti okwa hala okulundulula uudhano wokumatuka mbuka okuwu tula pomuthika gwopaigwana noku hila aamatuki mboka taya zi pondje ya Namibia oku kuthombinga.

Shokonawa ye mwene ota ka kuthombinga mokutondoka oshinano shookilometa 42.4. Iinano yilwe mbyoka tayi  ka matukwa ongaashi shoka shookilometa ntano, ookilometa omulongo netata lyomarathono ano oshinano shookilometa 21,1.

Uudhano wokutondoka oshinano oshile mbuka owa pewa ekwashilipaleko lyooN$110 000. Ndyoka Shokonawa a ti olwo lwotango uudhano mbuka tawu pewa ekwashilipaleko lyomwaalu gwakonda pooN$100 000. Omwaalu omunene ngoka uudhano wokumatuka waShokonawa wa li wa pewa ogwa li ooN$72 000, omumvogu natango tuu okuza ishewe kuAmukwiyu.

Okwa ti aatondoki aakwashigwana yaAngola 13 oya koleke kutya otaya ka kuthombinga muudhano mbuka, oshikando shotango , omanga konyala aatondoki yaheyali yiinano iile aaSouth Africa na yo oya ulike yena ehalo oku kuthombinga mokutondoka huka. “Otashi ka kala oshikando shotango sho omusindani guudhano mbuka omukiintu nomulumentu taya ka pewa ondjambi yooN$5 000 kehe gumwe okuyeleka nonakuziwa shono omusindani a li ashike ha pewa oo N$1 600,” osho Shokonawa a ulike.

LEAVE A REPLY

Please enter your comment!
Please enter your name here