Kambala uulikwa a kalele po Swapo mOnyaanya

0
199

ONYAANYA –  Omukwatakanithi gongundu yoSwapo moshikandjohogololo Onyaanya, Petrus Kambala mOmaandaha goshiwike shika okwa li a hogololwa oye ta kala okandidate yoSwapo momahogololo ngoka taga ka ningwa moshikandjohogololo osho tuu shika.

Shino oshali sha ningwa konima sho ngoka ali nale ta wilike oshikandjohogololo shika Omusamane Henock Kankoshi ali a ulikwa komupresindente goshilongo Omundohotola Hage Geingob opo a ninge Ngoloneya goshitopolwa shaShikoto, a landula Omusimanekwa Penda Ya Ndakolo ngono a ningi Minista yEgameno muMaalitsa nuumvo.

Momahogololo ngono gali ga ningwa omwa li mwa kalwa kaaleli yongundu ya za komikunda dha yoolokathana moshikandjohogololo mono kwa li kwa zi aantu yahamano ayehe mbono oyo aaleli yongundu shono she eta opo aahogololi ya kale yeli 88.

Kambala ngono oye a hogololwa a kalelepo ongundu tayi pangele okwali a yambukamo nomawi 43 maahogololi yeli 88, Gideon Shikomba okwa li a zimo nomawi 23,Sakaria Alugodhi okwali a yambukamo nomawi 20 omanga Natalia Shikongo ali a zimo owala neke limwe noye awike omukiintu ali a kuthombinga.

Kambala pethimbo ta taambako oshinakugwanithwa shika shoku kalelapo ongundumpangeli momahogololo ngoka ga thaanekwa taga ka kalako mu 9 Juli okwa ti okwi ilongekidha ngaashi tashi vulika ku gandja omayakulo agehe, ta holola kutya ota ka tameka mpoka kansela Kankoshi a hulile nokuhumitha komeho oshikandjohogololo shoka.

Pethimbo a kala omukwatakanithi gwongundu Kambala okwa holola kutya okwe ende omukunda nomukunda omolwa ohole yongundu tayi pangele. Ta ti okwa kala ethimbo ele mewiliko lyoSwapo. Okwa pandula ewiliko alihe mOnyaanya sho lya mono kutya okwa gwana a kalelepo ongundu tayi pangele momahogololo guukansela ngoka ga tegelelwa.

Omugandjimayele gongundu mOshikoto, David Quito Mulunga okwa holola kutya omahogololo oge enda nawa no gali pauyuki ngaashi shali sha tegelelwa.  “ Otwa li owala twa pumbwa omuntu gumwe sho osho twa ningile omahogololo nena, atuhe aasindani oshoka omuhogololwa gwetu oye ta kalelepo ongundu yetu yoSwapo onkee natu nyanyukweni tse tu kaleni muukumwe wumwe,” Mulunga ta gwedhapo ngaaka.

 

LEAVE A REPLY

Please enter your comment!
Please enter your name here