Meroro a hamalwa kOmurussia

0
283

WINDHOEK-Edhiladhilo lyenyakwa lyaNamibia mondjundo yAfrica cruiserweight  Vikapita ‘Beast Master’ Meroro’s inali enda ngaashi a li a hala opo ando eetelele epaya lyondjundo yopauyuni yoWBA International Cruiserweight kegumbo.

Meroro ina vula oku etelela epaya ndyoka molwashoka okwa dhengwa yimwe nopevi kenyakwa mondjundo ndjika Dmitry Kudryashov moMoscow, Russia medhingoloko etihamano lyolugodhi lwawo lwomadhingoloko 12. Olugodhi nduka olwa li ko mEtitano oshiwike shayi.

Meroro okwa tamekele olugodhi lwe nawa nokwa li eshipondola oku kaleka ‘Russian Hummer’, kokule ngaashi Kudryashov eshiwike nawa maandjawo. Okwa kala ta dhenge oongonyo meendelelo ye ta papatele  ementu ndyoka enene molutu lyoko Russia omanga ementu ndyoka inaali mona ompito oku muumba oongonyo dha pupyala.

Okwa kala te shi enditha nawa mokudhenga ye ta kwata sigo omedhingoloko etitano,inaa pitika nando Kudryashov ompito opo a longe nokukondja nawa mokupopila oshishani she. Ihe okuuka pehulilo lyedhingoloko etitano Meroro okwa fa a tameke okweenda kashona.

Medhingoloko etihamano Meroro ngoka a lit a monika a loloka ka li we ta vulu okukondjoka nondapo ndjoka ya li tayi kondjwa nayo komukondjithi gwe omuRussia, onkene okwa tameke ta holama, opo Kudryashov okwa tsikile oku mu tidha sigo okwe mu kondekele koongodhi noongonyo ndhoka uumbu okawatawata a dhenge Meroro moombati nomolutu naandhika odha gwitha Meroro ngoka a thikama po ishewe mbala ihe ina kala komagulu ge ethimbo ele konima yaashoka oshoka Kudryashov okwa li inaa mana natango okumu dhenga nawa. Okwe mu kondekele ishewe koongodhi hoka emu dhenge natango moombati naanguka okwa gwile pevi uudha uuwehame no ina vula okuthikama po omanga omuhikihiya inaa thika okuyalula sigo okomulongo.

“Meroro okwa lit a kondjitha omudhengingonyo a kindja ye ishewe oha longitha omutse mokukondja kwe, ngoka sigo oompaka inaa dhengwa nando omolugodhi lumwe.Onkene ngame kandi uvite nayi kombinga yiilonga ye.Otwa li twa longekidha nawa okumu piyaganeka mokumuumba oongonyo tse tatu papatele, noku mu ningitha a kale tuumbu oongonyo tadhi palutha olundji. Meroro okwa kala emu landula okathimbo ihe medhingoloko etihamano okwa fa a vululukwapo nopo mpoka okwa dhengwa ongo yimwe ndjoka ye mu kutha omufudho inaashi tegelelwa ye nokwa ndopa okuthikamapo mbala omanga omuhikihiya inaa yalula sigo opomulongo,’osho Tobias omudheuli gwe ati.

“Meroro omudhengingonyo eshi okutangwa oshowo ye enyakwa. Okudhengwa huka inaku pumbwa ku talike ongo endopo.Huka oko oshilongwa iilonga. Tse otatu shuna kongulu yoku idheulila nokulonga noonkondo oshowo nondunge, kakele kaashoka Meroro okuli nawa palutu nopamadhiladhilo.”

 

LEAVE A REPLY

Please enter your comment!
Please enter your name here