Nainda a lukilwa osenda yoNetwork

0
218

OMUTHIYA –Kakukutu kOmatanga gopolisi yaShikoto Commissioner Anne-Marie Nainda mOlyomakaya goshiwike shayi okwa li a lukilwa oshitayi shElyenge lyAakiintu nAalumentu yIimanga kumwe mOkukondjitha iimbuluma shopOmuthiya.

Nainda ngoka ali a talele po oosenda yaMuthiya noonkwao dhopuushiinda, okwa li a ende pamwe naakuluntu yoosasiona dhopolisi popepi nOmuthiya ngaashi Nathanael Haiyaka gokosasiona kOnayena, Hilja Kaukungwa gokOkatope na yalwe woo. Mosheendo she okwali woo a ende pamwe nomukwatakanithi goshigwana nopolisi mOshikoto Stefan Nuuyi.

Etalelepo lyaNainda olyali lya ningwa konima sho ali a tseyithilwa kutya osenda yaMuthiya oye, ya lukilwa no kwali eya nosheendo she ye a mone mbushe noku kwashilipaleka kutya shoka ta lombwelwa osho shili ngaa.

Kommisiona Nainda pethimbo ta popitha  elyenge ndyoka lyi imanga kumwe mokukondjitha iimbuluma okwali eya tsu omukumo opo ya longe nuudhiginini yo iimbuluma mOshikoto yi kale ya yelamo thilu. Ta pandula sho aluhe elyenge lyelongelokumwe ndika lyaakiintu naalumentu hali kalekepo elandulathano momikunda.

Ta tsu woo omukumo opolisi yi longele kumwe nelyenge lyoomeme notate mokukondjitha iimbuluma, yo iimbuluma ayihe yi kale ya lopotwa mbala kopolisi. Ta ti yo ethimbo kehe oyi ilongekidha ku kondjitha iimbuluma unene onkalo yuumbudhi nuufuthi moshigwana.  Ta pandula woo sho a lukilwa osenda ndjika yonetwork mOmuthiya.

Tuhafeni Shilola gumwe gomaawiliki yo Women and Men Network mOmuthiya okwa ti osenda yonetwork oya totwapo mo2011. Mono ta holola kutya oya tamekele niilyo iishona ashike konima anuwa omwaalu ogwe ke enda tagu indjipala.

“Kashali oshipu oku uvako iinakugwanithwa yonetwork petameko ashike sho twa kala noku fatululilwa otwe ku uvako nawa, otwa kala ta tu longo nuudhigu oshoka aakwashigwana yamwe oyetu tondo yo yamwe taye tu luku omadhina , ashike shino inashi tu tulitha omutse kepepe otwa longo nuupenda sigo twa tameke omalongo momikunda kombinga yekondjitho lyiimbuluma, ngashingeyi onda nyanyukwa ku tseyitha kutya ohatu longele kumwe naakwashigwana niimbuluma oyindji otweyi kondjitha,” Shilola ta ti ngaaka.

Shilola ta gwedhapo kutya oya tokola opo osenda yawo ye yi lukile Komissiona Nainda omolwiilonga ye iiwanawa mbyono ta longo moshigwana nomolweyakulo lye ndyoka aluhe he ya pe uuna taya ningi iigongi yo women and men network mOshikoto. Ta ti otaya tsikile ku longela kumwe nopolisi noku lwitha iimbuluma kehe mOshikoto.

LEAVE A REPLY

Please enter your comment!
Please enter your name here