Okabinete otaka kondjitha omukithi gwekondo nelaka

0
230

WINDHOEK – Okabinete oka uvaneke okudhika po ondhalate pokati ka Namibia naAngola okungambeka etaandelo neindjipalo lyomukithi gwiimuna ngoka hagu taandele meendelelo.

Omukithi nguka gwekondo nelaka ogwa kwata iimuna miitopolwa Ohangwena, Oshikoto nongashingeyi ogwa monika guli miimuna yomoshitopolwa Omusati.

Minista Yuunamapya Omeya nOmakuti John Mutorwa okwa ti Okabinete oka ti ondhalate yokondolola pokati kiilongo mbika iyali kokutya Namibia naAngola osho owala omukalo tagu keelele noku kuthapo uuvu mbuka sigo aluhe moNamibia. Okabinete oka adha etokolo ndika konima sho kwa kolekwa kutya eholoko lyomukithi nguka olya ziilile miimuna yAanamibia mbyoka ya yi mekwatathano niimuna yomoAngola nenge mbyoka hayi ka napa koshilongo hoka.

Ndika olyo eholoko enene lyomukithi gwekondo nelaka miitopolwa yevi lyaayehe kuumbangalantu woshilongo momimvo omilongo ne nOkabinete okati oshinima shika osho onkalo yoshiponga yopashigwana.

Mutorwa okwa tseyitha kutya Okabinete oka zimine ethaneko lyiitsa ihamano okukondjitha onkalo yoshiponga ndjika na otali ka longitha oodola oomiliona 157 okukondjitha omukithi nguka hagu endelele naangoka tagu tula oshitopolwa shuuniimuna moNamibia ,moshiponga oshinene, notashi vulika shi yonagule oshimpungu shika shomahupilo goshilongo.

Oshiwike shayi Okabinete oka li ka gandja elombwelo opo pu ngambekwe omainyengo giimuna oshowo iilongomwa yiimuna muumbangalantu woshilongo.Moondjila omwa tulwa woo omainda pomahala omawanawa mpoka iiyenditho hayi shaminwa omiti okuyi kutha oombuto dhuuvu mbuka tashi vulika ndhoka dhi li kiiyenditho nenge miiyenditho. Omutoolinkundana gwa Kundana okwa hokolola kutya pomahala gamwe muumbangalantu aakwashigwana mboka ya li ya humbata onyama nenge omahini oshowo omwiidhi , ayihe mbika oye yi kuthwa, ya tilwahi ngaashi omahini nokufikwapo ngaashi omwiidhi nonyama okungambeka etaandelo lyomukithi ngoka.

Einyengo lyiinamwenyo okuza kuumbugantu womusinda gUunamiti wIinamwenyo ngoka gwa topolako iitopolwa yaayehe kwaambyoka yuulithilo wopamahupilo nago oga mwenekwa. Oshowo kapena we omuntu ta pitikwa oku inyengitha iimuna ye okuya nenge okuza moAngola nenge okuya moNamibia.

Ewilikongundu lyonyama moNamibia olya gandja oodola oomiliona hamano okukondjitha omukithi nguka omanga oshikondo shUunamiti wIinamwenyo osha koleke kutya omiti dhokutuntila iimuna dhuukende wuli po 500 000 owa thika okuza koBotswana. Konyala omiti dhetuntilo dhili pomiliona yimwe oshinkwanu mbali otadhi ka pumbiwa okutuntila iimuna ayihe miitopolwa yokuumbangalantu osho omuwiliki ta kwathele mUundjolowele wiinamwenyo omundohotola John Shoopala a lombwele Kundana.

Mutorwa okwa ti oomiliona N$112 otadhi ka longithwa okulanda omiti dhetuntilo pathaneko lyOkabinete ndyoka lya tseyithilwe mEtiyali oshiwike shika, omanga oomiliona ndatu oshinkwanu ne otadhi landa iilongitho yotuntila noomiliona omulongo nambali  odho ku futa aaniilonga molwa okulonga olutaima.

Opo omukithi nguka gu kondjithwe nawa Okabinete oka indile iikondo shOmudhingoloko, nOmatalelopo, Egameno oshowo Shepopilo Negameno lyoshigwana yi longele kumwe mokulongitha oonzo dhayo okukwathela mekondjitho lyomukithi nguka gwekondo nelaka. “Shika osha kwatelamo iilonga yokukwatakanitha, okukundathana nokulongela kumwe nomawiliko giitopolwa oshowo noongoloneya yiitopolwa, aawiliki yopahedhi, aawiliki miitopolwa nomahangano gaanafaalama,” osho Mutorwa a dhenge omuthindo.

Sigo uuna ndoka pwa dhikwa olugumbo ndoka talu kalele, Oshikondo Shuunamapya otashi kala nokulongitha omainda gomoondjila moondjila oonene dhoshilongo okungambeka omainyengo giimuna kiitopolwa yilwe.

Oshapumbiwa iimuna yi tuntilwe lutatu, etuntilo ndyoka lyongashingeyi etiyali tali ningwa meni lyomasiku omilongo 30 nolya hugunina tali ningwa meni lyomumvo gumwe.

Omukithi nguka omutilithi ogwa thikameke iilonga yokulonga nokudhipaga oongombe mokatomeno ka Meatco Oshakati Abattoir kuyele nuumvo molwashoka nguka ogwa li gwa monika moKavango East nomoshitopolwa sha Zambezi.

LEAVE A REPLY

Please enter your comment!
Please enter your name here