Omuhikingalo dhingi moKora taka sindana oomiliona N11, 78

0
205

Omuhikingalo dhingi Omuafrica ngoka ta ka sindana pethimbo lyegandjo lyomapapa gaahikingalo hali ithanwa Pan African Kora Awards ota ka faalela kegumbo konyala oodola oomiliona N$11, 78.

Egandjo lyomapapa ndika lyaahikingalo naanuunongo miiyimbo menenevi olya thanekwa okuningilwa moVenduka okuuka pehulilo lyomumvo nguka. Ethigathano ndika otali ningwa kohi yoshipalanyolo” Back Home’ na otali ka pa omwiimbi dhingi menenevi oshimaliwa shoodola dha Namibia oomiliona 11, 78.

Omapapa ga Kora Awards oyo ondjila yimwe moka aahikingalo ya Africa taya ulike uunongo wawo taye wu ulikile uuyuni oshowo aantu ayehe yomenenevi ndika. Ethigathano ndika hali ningwa omumvo kehe ohali hiya noku ithana aayenda taya shambula okuza koombinga ne dhuyuuni mboka yiitulamo mehumithokomeho lyomusiki oshowo uunongo woku imba nelalakano okukumika nokweetapo oondjimbo oompe dho inaa dhi imbwa nale.

Kora Awards oyo oshiindingili oshinene shokuyalula aahikingalo oshowo omusika menenevi Africa shoka sha totelwepo komusamane Ernest Adjovi omvalele yomuuninginino wAfrica omumvo 1994.

Aahikingalo momaizizimo gayoolokathana otaya ka pandulilwa iilonga yawo iiwanawa moku pewa oodola dhAmerica pokati koUSD 25000 nenge(N$284250) noUSD 50,000 nenge (N$589000) shi ikwatelela kokategoli moka omuhikingalo ta kuthombinga methigathano ndika.

Omuhikingalo omuNamibia oye awike ngoka a sindana epapa lyoKora Award mokategoli komwiimbi dhingi omulumentu mUumbugantu wAfrica omumvo 2013, Martin Morocky, a tseyika nawa The Dogg okwa ti esindano ndika olye mu yalulitha kuuyuni nokwa ningi omwiimbi eshiwike miilongo yilwe pondje yAfrica.

“Osha ningile ndje oshipu opo ndi vule okulonga naahikingalo yalwe yopaigwana naashika osha etele ndje uuwanawa owindji ,” osho The Dogg a ulike.

Gumwe gwomaahikingalo ya simanekwa moNamibia, Ben Kandukira AKA Big Ben okwa taambako oshiithanene shegandjo lyomapapa shika a ti “Opena okukala etompelo kutya omolwashike South Africa a kala a hala maandjawo omo mu kale hamu ningwa oshiithanene shika ethimbo alihe. Big Ben okwa ti uuwanawa mboka aahikingalo taya ka mona otawu kala owundji ngaashi moku kwatathana naahikingalo yalwe ya za komahala giili nokiilongo yilwe muAfrica oshowo palwe muuyuni.

“Shika otashi tu pe ompito opo tu tunge omakwatathano naahikingalo yalwe mboka ye li moshimpungu shoongalo ngaashi tse, nondjambi yiimaliwa mbyoka tayi gandjwa omuntu oto yi taamba ngoye eto yi pungula meithano lyetu  lyuuhikingalo.Ndika otali ka kwathela shili aanongo moondjimbo  yaamuka. Omuhikingalo omuAfrica kehe ngoka ta ka sindana iimaliwa mbika ota ka kala uuvite Elago nokwa nyanyukwa,’ Big Ben a ti.

Ya totwapo omumvo 1994 komunangeshefa Ernest Coovi Adjovi,ngoka ye mwene omvalele ya Benin, oshiithanene shotango shoku gandja omapole kaahikingalo dhingi yAfrica naamboka ye li muundjendi osha ningilwe lwotango omumvo 1996 moJohannesburg moSouth Africa sigo onena, negandjo lyomapapa ndika olya ningwa ngashingeyi iikando omulongo 12.

Omapapa ngaka ogo  oludhi lwoPan Africa lwokupandula aahikingalo ngaashi omapapa ngoka haga ithanwa Grammy Awards ngoka ogo haga talika unenene moTiivi muuyuni auhe konima yuudhano wetanga lyOkoompadhi lyUuyuni oshowo uudhano wOlympika.

Omuhikingalo omuNamibia  The Dogg oye omutiyali okusindana epapa lyaKora omumvo 2012 sho a li a hogololwa omimvo ndatu a landula ongundu yaakadhona yo Gal Level ndjoka wo ya li ya hogololwa ikando itatu.

Omumvogu omwiimbi gwiiyimbo yoShambo Tunakie okwa li a hogololwa mokategoli komwiimbi dhingi gwomusika yopamuthigululwakalo.

Etseyitho li na sha negandjo lyomapapa ngaka olya li  lya ningilwa moVenduka nolya li lya kalwa kaahikingalo aaNamibia oshowo mboka ya za koSouth Africa mokati kawo mwali Mafikizolo.

Oshiindingili shika tashi ka ningwa mu Desemba nuumvo osha ithana aasimani noohashike  shalye mokuhika oongalo yopaigwana opo ye ye koshiithanene shika.

Etseyitho pambelewa lyaamboka taya ka kuthombinga molwashoka oya hogololwa otali ka kalako muAuguste moVenduka nopena ompito opo pethimbo ndyoka Akon a kale omwiimbi a simana.

LEAVE A REPLY

Please enter your comment!
Please enter your name here