Ovakwati veeshi domohanya oveli we mokashoko kopolifi 

0
183

ONGWEDIVA – Ovalumenhu vaheyali oveli momeva mapyu eshi exuliloshivike la dja ko vahangelelwa tava kwata eeshi metale lohanya mOutapi takufekelwa kutya ova li vena elalakano lokudilandifa moshiwana.

Elelo lOdoolopa yaUtapi oya patululila ovalumenhu ava oshibofa shoukukwata eeshi mohanya nenyonauno lomaliko.

Kakele kokukwata eeshi mohanya osho tashi dulu okuetela oshiwana omikifi dayooloka, ovalumenhu ava ova teta yoo odalate yondilo oyo ya dingilila omatale ohanya, veininga oivelo oyo paife nokuli hai pitile oimuna.

Ouyelele oo wayandjwa komunambelewa pomukulunhu wodoolopa mOutapi ovalumenhu ava paife va ninga ovafekelwa ova hangelelwa veli tula mo tava nete voo tava ndjolola eeshi mexuliloshivike.

“Out wete ovanhu ava okwali teve li pula kutya shaashi okwali mexuliloshivike lile, ovanambelewa vamuni kave mo moilonga. Ashike elao linene ovakwashiwana ovo veva mona ova lombwela ovanambelewa ovo vali tava longo efiku olo, novanambelewa ova dengela opolifi.

“Eshi opolifi yeuya, oinima yavo mwakwatelwa eeshi odo va kwata po neenete neendjolo, opo ashike ve i fiya opo, vo tatva faduka po. Vati ova dula ashike okufaduka po nokatololi,” Nashilongo ta ti.

Opolifi oya li ashika ya dula okukwata po vavali vomovafekelwa ova vaka popya vakwao ovo vali navo.

Vamwe vomovafekelwa vati ovanailonga vomomatungo modoolopa, vamwe vomuvo ovakalimo vomodoolopa vamwe ovopomikunda dopopepi nOutapi.

Nashilongo onghene hano okwa kunghilila oshiwana unene ovakalimo vomodoolopa yaye va ha lande eeshi odo tava hange tadi landifwa momapandaanda.

“Omeva oo eli momatale ohanya oyaa haalongifwa oiekelwa shi oyo hai di momaumbo omodoolopa yetu mwa kwatelwa oundjuo. Kakele komaumbo omeva amwe ohaadi koshipangelo a koshifwa nomidimba dovanhu. Hano omeva ohanya okwa kaka neenghono, okuna eembakiteli neevirus odo tadi elele ovanhu omikifi. Omunhu ngee tali eeshi odo ota li ashike oudiyo, kape na shimwe,” Nashilongo ta fatulula.

Omunambelewa ou ta yelifa kutya ovanhu vamwe paife otava longifa omukifi wekondo nelaka oo wa eta omhumbwe yoshivelelwa onga elao lavo opo va landife oihayotwa koshiwana osho shili momhumbwe. Ta ti omolwa omukifi  wekondo nelaka oshiwana osha keelelwa mhanga opo shi ha tome nokulandifa ombelela yongobe.

Kakele keefitola dopomufika mOutapi, omatala oo shike onhele ya amenwa noshiwana tashi dulu okulanda oshivelelwa sha koshola.

LEAVE A REPLY

Please enter your comment!
Please enter your name here