Tu kwatheni okungambeka etaandelo lyomukithi gwekondo nelaka

0
221

Okungambeka etaandelo lyomukithi gwekondo nelaka otashi ningwa kutseni atuheni, mboka yena iimuna, aasita yiimuna, naamboka taya ende okuza nokuya komahala ngoka ga gumwa komukithi nguka, kehe gumwe na kuthe ombinga mokukondjitha omukithi nguka.

Shika itashi ka kala oshipu ndele oshina okulongwa.Shotango atuhe ohatu longitha onyama opo iikulya yetu yi kale yi na omulyo. Ihe nando ongawo otwa pumbwa okulandula omalombwelo ga tulwapo kUuministeli Wuunamapya, Omeya nOmakuti kutya; Ngele ouna ohango, efumviko nenge oshiithanene shontumba nowa hala oku inyengitha  ondumetana, oshikombo, onzi nenge oshingulu okuza shaampoka kutya nee okohambo okuya hoka kuna oshituthi, alikana tango kundathana  nomunambelewa gwoshikandjohogololo sheni, mwene gwomukunda  nenge ombelewa yuundjolowele wiinamwenyo yili popepi nangoye.

Shika osha pumbiwa oshoka opwa tulwa omautho gokondolola ga dhiginina kombinga yomainyengo giimuna, naangaka oge li oshitopolwa shoku kwata moshipala etaandelo lyomukithi nguka .

Oshikondo Shuunamapya oshe shi popi sha yela noshuukilila kutya einyengo lyiimuna oongombe , iikombo, oonzi niingulu okuza momahala ngoka gena omukithi nenge mwaangoka gaana omukithi okuka dhipagwa molwa oohango omafumviko nenge okuliwa megumbo oga pitikwa niinamwenyo mbyoka oyina okudhipagwapo meni lyootundi 24 okuza sho oshinamwenyo shoka shi inyenge okuza kehala limwe okufalwa kehala ekwawo.Omainyengo gatya ngaaka otaga kala kohi yetonatelo lya kwata miiti lyaanambelewa yuundjolowele wiimuna. Omahini gomunya, onyama,omwiidhi gwokukumba, omwiidhi gwiimuna, niihenguti otayi vulu oku inyengithwa okuya mehala lina omukithi nenge miitopolwa yomehala ndyoka lina uuvu ihe mbika ina yi pitikwa oku inyenga okuza mehala moka muna omukithi nguka okuya kehala ndyoka lyaana omukithi.

Oholomende otayi longitha oshimaliwa shoomiliona dhoodola 157 okungambeka omukithi nguka. Oomiliona 112 odhokulanda omiti dhoku tuntila omanga oomiliona ndatu oshinkwanu ne odhokulanda iilongitho yokutuntila, dho oomiliona 12 otadhi longithwa okufuta aaniilonga yokutuntila omolwa sho taya ka longa ethimbo lya pitilila ootundi dhuuthwa dhiilonga mesiku.

Iimaliwa ayihe mbika tayi longithwa itayi ka kwatha she ngele oshigwana momahala ngoka gena omukithi itashi gandja elongelokumwe lyasho moshinima shoku kondjitha omukithi nguka. Omanga tashi kala oshigeeki okukala to thikamekwa ethimbo alihe moondjila omathimbo nomalupita oku talwa oshowo okutsininwa, natu uviiko kutya shika otashi ningwa moluuwanawa wetu.

Oshikondo shonyama shaNamibia  oshina ongushu yoodola obiliona yimwe oshinkwanu ne omumvo kehe. Shika otashi vulika okutalwa shaana omwago ihe ngele omukithi nguka inagu mwenekwa mbala itatu  ka mona we onyama yokulya moomwedhi tuuka. Oshoka iinamwenyo otayi ka kala tayi ehama no yaana uukolele wa gwana opo yi dhipagwe aantu ya lye onyama.

Omimvo omilongo ne dha pitipo okuza sho omukithi nguka gwekondo nelaka gwa li gwa holoka moshilongo, ngaashi nguka gulimo nena. Onkene onkalo yonena oyo onkalo yoshiponga noye ulumompumbwe.Onkene kehe gumwe okuna okulonga okukeelela etaandelo lyomukithi nguka. Naamboka wo yaana iimuna nayo oya pumbwa okuzala omizalo dha yogoka uuna taya zi miitopolwa mbyoka yi na omukithi oku ya kiitopolwa yilwe. Omahini gomunya oga pumbwa okufulukithwa.

Omahala ngoka gena omukithi nguka ogo Ohangwena ayihe oshowo iikandjohogololo ayihe moshitopolwa Omusati.Moshitopolwa Oshikoto iikandjohogololo mbyoka ya gumwa komukithi gwekondo nelaka oyo Okankolo, Onyaanya, Omuthiya, Eengodi, Onayena, Oniipa. Moshitopolwa Oshana iikandjohogololo moka iimuna ya gumwa kuuwehame mbuka oyo Ondangwa, Okaku, Ongwediva, Oshakati East nUuninginino, Okatana, oshowo Ohangwena. Mpungu mo Kavango okwa tulwa wo mongundu yomahala gena omukithi nguka.

Ehala lyokungambekela omukithi nguka olyo oshitopolwa sha landula opate onene yoteya yonomola B1 okuza kOshivelo  sigo okOshikango, okuya komweelo gwa Bravo Gate, okuza ko Bravo Gate okupitila mesilu lya Mpungu okuya koongamba dha Katwitwi oshowo oongamba dha Namibia/Angola.

Omuwiliki ta kwathele mUundjolowele wIinamwenyo Dr John Shoopala okwa ti omukithi otagu taandele meendelelo guuka ombinga yokuuninginino na oshidhigu okutengeneka kutya iimuna ingapi yomiimuna omiliona yimwe oshinkwanu mbali  miitopolwa yokuumbangalantu ya gumwa komukithi nguka.

Otuna okulongela kumwe okusoshimpwiyu kutya omukithi nguka itagu tsikile nokutaandela we.

 

LEAVE A REPLY

Please enter your comment!
Please enter your name here