Meekulu Liina Mhanda a wanifa eedula 89

0
236

ONGWEDIVA – Ovalongwa noshoyo ovalongipamwe nomuhongifikola mukulu meekulu Liina Mhanda, exuliloshivike ladja ko ova tyapula edalo laye leedula 89, sha ningilwa pOkahao.

Meekulu Mhanda okwa kala omulongi a shivika nawa nokwa li kapyoko mokulonga oshilongwa shopaunongononi shoBiology pofikola nale youkadona pOkaumbo nomosekondele mEtalaleko.

Omukulupe ou okwa dile komukunda Etomba mOshitukulwa shaHangwena ashike okwa kala a tungila kOkahao oko a ile ko omido donale a ya ko a twala ehongo.

Kakele koulongi meekulu Mhanda okwa kwafela yoo moukomitee vahapu vongeleka nokwa toloka yoo omambo mahapu. Ovapopi va yooloka ovo va li poshivilo ova hokolola omulongi, nomunailonga pamwe navo ou onga a kala ehole ombili nokuhole okuninga osho shili nawa.

Ye mwene okwa popya nelixupipiko ta pandula Kalunga ye ta ti okuhole aveshe ovo va kufa eifano loulongi shaashi elongo olo ina younongo aushe, na olo A na Z. Ta ti oshilonga shoulongi oku shishi nawa, nashi ite shi popi shaashi ngeno a hala oku li tada, nokuudite kutya pefimbo olo ye ali omulongi, okwa longa ashishe osho ali ena okushi longa. Movapopi va fimana ovo vali koshivilo dalo eshi, omwa kwatelwa Omubiishofi eli moshipundi shetulumuko tatekulu Josephat Shanghala, Meme Pashukeni Shamena, ovafita Seblon Ekandjo na Wilbard Shikesho. Omuwiliki woshivilo okwali meme Ndiyakupi Avia.  Ovakulupe vahapu ova li va ninga onhanda peumbo lameekulu ou tava hambelele pamwe naye.

LEAVE A REPLY

Please enter your comment!
Please enter your name here