Nghipandulwa ota enditha nawa uuhikihiya ….nando okuna ashike omimvo 19…

0
372

ONGWEDIVA-Nando eli lela pomimvo omishona Samuel Nghipandulwa ote shi enditha nawa meithano lyuuhikihiya moka eli nale ha hikile oosipana oonene moliha yo First Division.

Omvalele yomOshifo mo Ruacana, Nghipandulwa okwa li a tameke etanga lyokoompadhi ongomudhani gomokoola posikola yo pevi yedhina Otjihodhu Primary School.

“Onda li handi tila omayehamo ngoka aadhani ha ya mono onkene ndali aluhe ndina uutile okweehamekwa naashika osha li sha etandje ponkatu opo ndi ethepo okudhana etanga lyo koompadhi”, Nghipandulwa ta ti.

“Konima sho nda ethapo okatanga kokoompadhi ondali nda kwatwa kohokwe yokuhika ohiya onkene aluhe ondali nda longithwa okuhikila uunona uukwetu posikola yetu ngele tawu dhana”,Ngipandulwa ta tsikileko.

Okwa ti olwindji uudhano owali hawu dhanwa pwaana omuhikihiya, nasho a li a tameke okuhika kaya li yena okahiya, ashike okwa li a longitha uundooha mboka ali hewu dhenge kumwe ngele aadhani oya ningi epuko mokapale.

“Mo 2011 ondali nda ithanwa opo ndi ka hike uudhano waakokele “Oucrocks games” mboka wali kOshifo hoka nda li nda fuula oyendji noshitalenti shandje nando pethimbo ndyoka onda li ashike ndina omimvo 15”.

“Konima yuudhano ondali nda ithanwa ku Paulus Herman ngoka ali a lombwelendje kutya okwa hala ndi tsikile neithano ndika nokwa ti ota kwatakanitha ndje na Arvo Mufeti ngoka ha dheula aahikihiya koNooli”.

Okwati Arvo okwa li a nyanyukilwa ndje sho a ti aantu yoludhi ngaashi ngaye oyo  pumba.

Arvo okwa li a pendje omambo goompango dhokatanga kokoompadhi naa onda igwedheleko kuunongo woku wilika uudhano.

Mo 2013 onda li nda hiwa ku Absalom #Goseb omunambelewa gwo NFA koVenduka naasho ali a mono uunongo wandje, okwa li a yi nangame kuudhano wekopi lyo Scorpion Zinc moka ndali nda mono ompito yoku hika uudhano wandje wotango wopombanda moka nda li nda ulikwa ongo omuhiki hiya dhingi muudhano wekopi ndika.

Eduardth Boy Boy Ndjandila ngoka eli omugandji gomadhewo a kalelapo ehangano lyo FIFA moNamibia okwa li a nyanyukilwa ndje nokwa li wo ena ohokwe okukwathela ndje.

Samuel ngashiingeyi oku li ha longithwa oku hika moliha ontiyali moshilongo ano yo North West First Division moka hamu dhanwa koosipana ngaashi, KK Palace na Life Fighters.

Oha longithwa wo oku hika mekopi lyoshifo sho The Namibian.

Okwa ti etokolo ali akutha enene olya li nuumvo puudhano pokati ko Golden Bigs no Young Chiefs nokwa li eli ningi iikwatelela kooveta dhokatanga kokoompadhi.

Samuel ota indile uumati uukwawo opo wu kuthe eithano muuhiki hiya oshoka ngele aahiki hiya mboka yeli po oya kulupa nena oshilongo ota shi ka kala shina ompumbwe yaahiki hiya, ta ti na ye shi ninge meendelelo oshoka NFA okwe ya tegelela.

Okwa ti ondjodhi ye oyo okuhika muudhano wekopi lya Africa moka a hala ahike uudhano pokati ka Nigeria na South Africa omanga muuyuni a hala a hike uudhano pokati ka Spain na German.

Okwa ti wo kutya oku hole osipana yo KK Palace oshoka oyi na aadhani ye mu simaneka na ohaya iyutha komalombwelo ge mokapale, ashike okwa ti okuhola kwe kosipana ndjika iha kuyi iilonga ye moshipala onkene ngele eli mokapale ta fudhile ohiya oha talako oosipana adhihe dhi thike pamwe.

LEAVE A REPLY

Please enter your comment!
Please enter your name here