Omukifi wekondo nelaka

0
261

Komutoolinghundana

TSUMEB – Etukuko lomukifi wekondo nelaka omwedi wa dja ko mOmusati, Ohangwena nOshikoto ola kuma omaxupilo oshilongo.

Koitukulwa yokombada yomufinda utilyana oku na oulifilo waaveshe notashi pula epangelo eemiliyona 119 okutunhila eengobe di fike pomiliyuna imwe foyo mbali. Ouyelele owa yandjwa komunambelewa pondodo yopombada koshitukulwa shoundjolowele woimuna Omundohotola John Shoopala. Okwa  ti eepelsenta 70 dovaNamibia  ohadi xupu moilikolwa  younamapya onghee omukifi ou eshongo linene kepangelo nokoshiwana.

Etukuko lekondo nelaka ola kuma omashikulafano epangelo mokukandeka oluhepo neetepo leemhito doilonga. Onghee epangelo ola tameka omakondeka meendjila domoitukulwa aishe  kombada yomufinda utilyana noimuna oshoyo oilongomwa ya dja moimuna nomoinamwenyo yomakondo a  tatuka, mwa kwatelwa oilikolwa yomomapya nomwiidi itai pitikwa vali yeetwe keenhele dimwe.

Oshitukulwa shaHangwena omwa tamekwa omakondeka pOupili, Oushake, kwa wedwa ekondeka likulu pOnhuno, koshitukulwa shaMusati Onaanda oshoyo keembinga dimwe, Oshivelo moshitukulwa shaShikoto okulandula ondjila yoB1 okuuka meni lomufinda utilyana. Epangelo ola tula ovanambelewa voshitukulwa shoundjolowele woimuna pomakondeka a yooloka pamwe novanambelewa vopolifi okuhada ovalongifi voshitauwa, vaha umbate ombelela, omashini nomaadi okuya keenhele da yooloka. Omatuwa otaa pombelwa komataiyela, ovanhu otava heluka momatuwa nokulyata pokambadwa opo vaha twaalele ombuto ya nyika oshiponga oko va uka.

Shoopala okwa tumbula  kutya oshiwana inashi pumbwa kutila ndele nashi luufe komalombwelo. Ehado kovalongifi veendjila  nande tali va tokifa, oo auke omukalo tau dulu ku ya moshipala omukifi. Mosoondaxa yadjako , ovalongifi vondjila B1 okuya meni lomufinda utilyana vahapu ova kala momikweyo diledile tava hadwa pOshivelo sha etifa omusholondodo womatuwa u lepale mondjila ya uka moushimba.

Pokati opo ongudu inene yovanafaalama moshitukulwa shaMusati moshikandjohoololo Okahao ,  ova unganeka osheendohololo madilaadilo sha pula epangelo li tule odalate pokati keengaba daNamibia naAngola  okukelela ekwatafano loimuna.

Oshivike shaya epangelo ola li la shiivifa kutya ekandulepo leshongo tali etifwa komukifi ou olo okutulapo odalate younamiti woinamwenyo pokati kAngola naNamibia opo oimuna yoilongo ei ivali iha paafane omukifi ou.Epangelo ola ti otali ka longifa oshimaliwa konyala eemiliona 50 okuhovela oilonga yodalate ei meendelelelo. Konima yemanguluko eengamba dokonooli opali pa tulwa odalate, ndele nee ovakalimo kombinga yaako ovali va ngongota kutya oya li tayi ngambeke elinyengo loimuna yavo oku kalya moAngola.

 

LEAVE A REPLY

Please enter your comment!
Please enter your name here