Taya li uulalelo woombuku nonande ohaya kwata openzela

1
352

“… esiku nda tindilwa oondjo dhomweelelo, ohandi the ombuku – omukulupe eelela. Siku inandi mona okambuku, twa ka lala nondjala…,”

OKAUKAMASHESHE – Aanegumbo yakuku Kristofina Kwedhi, gwoomvula 100, ohaya hupu unene mokufula oombuku, nolundji ohaya vulu okulala nondjala kaye na sho taya li. Shika osho nonando oyendji yomaanegumbo mbaka omugoyi ohaya mono oshimaliwa hashi zi kepangelo. Ethimbo limwe ohaya li iikwiila yuusila uukukutu inaa yi ya osuuka oshoka megumbo ngele omwa monika iilya, olwindji iha mu kala omweelelo.

Ofamili ndjika oyi li mOshikandjohogololelwa Oshakati shokUuninginino.

Aantu ya hamano yomaanegumbo omugoyi, mwa kwatelwa kuku gwaKwedhi yemwene, omwanamati Abraham Shikomba gwoomvula 50, omutekulu gwoomvula 39 ohaya mono openzela yaakulupe naamboka taya lumbu nuulema. Shikomba nomutekulu oha ya mono oshimaliwa shepangele oshoka ayehe oye na uulema womomadhiladhilo.  Kakele kumbaka yatatu, uunona uli utatu, wa Shikomba kehe kamwe oha ka mono oN$250, okuzilila kUuministeli wUukashike ko Okantu. Ano paku yalula, egumbo lyakuku gwaKwedhi alihe kumwe oha li mono oshimaliwa shithike po N$2550 kehe komwedhi.

Iimaliwa yuunona mbu uushona ayihe oha yi tambulwa ko kuShikomba yemwene. Ashike oshitopolwa oshinene shiimaliwa mbika mwa ka gwedhwa oN$600 yaShikomba mwene, anuwa oha shi futu oondjo dhiinamunate nomakaya gofenya ndhoka ha adhika a kutha puundingosho wopomukunda, mokati komwedhi.

Kansela gwoshikandjohogololelwa shaShakati kUuninginino, Aram Martin okwa ti onkalo yegumbo lyaGwaKwedhi oku yi shi, na ethimbo nethimbo yo namwene gwomukunda naawiliki yosenda yaKaukamasheshe oya kambadhala okukwathela egumbo ndyoka.

“Uudhigu mbu uli meugumbo lyaGwaKwedhi kau shi oluhepo ashike ekwato nawa lyoshimaliwa, na yamwe yomaanegumbo oye na uudhigu womadhilaadhilo. Oshimaliwa shoN$1800 shoka hashi kwatwa kehe komwedhi pokati kaGwaKwedhi, omwana Apele (Shikomba) nomutekulu, kashi shi oshimaliwa oshishona. Onkalo yomegumbo mono kayi shi oshinima oshipe oshinima oshikulu,” Martin ta ti.

Ta ti okwa ningwa oonkambadhala odhindji opo andola aanegumbo mbaka ya kale taya longitha iimaliwa yawo nawa, ashike ina dhi kwatha sha.

Oonkambadhala ndhoka odha kwatela mo okupopya nooyene yuundingosho pOkau opo Shikomba kaapewe we iinima moondjo, noku mu indika opo a vule ashike oku kwatela oshimaliwe she pomukunda gwawo mpoka. Ashike mbika ina yi kwa tha naanaa.

“Shampa ashike Apele a uvu Nangolo Naakulupe ta igidha openzela, kutya oyi kale yi li kOhaingu, Apele okuna owala okukwata olefa, e ta yi a ka kwatele kOhaingu sho ekwato tali ka thika pOkau, ye okwa kwata nale, noshimaliwa she osha pwa po. MOkau omuna aakwanezimo lyaantu mboka (yaGwaKwedhi), mboka ya li oyo ha ye ya kwatele oshimaliwa shawo ashike Apele aantu ohe ya kuthile omakatana ngashingeyi oha kwata oshimaliwa she mwene,” Martin ta ti.

“GwaKwedhi oto adha ta fulu ombuku eli omutumba ta ti ngeyi, ta ti ngeyi, ta gandja oonkondo kaatekulu,” Albertina Iithete, oshitenya shaGwaKwedhi tashi fulu, sho tashi ulikile Kundana.

“Paungame, esiku nda tindilwa oondjo domweelelo, ohandi the ombuku – omukulupe eelela. Siku inandi mona okambuku, twa ka lala nondjala. Nonena ina tu lya oshoka katu na omweelelo, ashike otwa nwa ngaa ontaku,” Iithete ta ti.  Epya lyawo olya siikililwa kongwena na kamuna nande ethinde lyoshihenguti limwe. Aanegumbo mbaka otaya ti oyali ngaa ya pulula ashike ina ya helela oshoka iilya yawo ayihe oya lika po kiimuna yopuushiinda oshoka ondhahalate yawo kapu na ngu teyi longo.

Iithete okwa ti yinamweno oha kwatelwa openzela ye komutekulu ngoka ta tekulwa kegumbo lili komukunda gumwe gwi ili omanga oshimaliwa shomutekulu gwomusamane ohashi taambwa ko komukwapata gumwe ngoka ha landa ekutu lyuusila nomweelelo esiku lyekwato, eta fala oshimaliwa shi sha hupa ko kombaanga.

“Ye mwene (omukwapata) oshimaliwa ihe shi li po oshoka oha eta uumbapila womafutilo gombaanga ye ishewe ngele pena uudhigu oha eta ngaa oshimwaliwa,” Iithete ta ti.

Shika oha shi tula aanegumbo moluhepo olunene oshoka okamaliwa hoka haya hupupo nako iha ke ya gwanene.

Iithete ta ti olwindji oha ya mono uulya mboka ye ha futwa ngele ye a longela aashiinda. Ethimbo nethimbo okanona hoka haka kwatele omukulupe nako anuwa ohaka tumu woo oolata ndatu nenge ne dhiilya. Ashike mbaka oha ya vulu oku tokelwa ya tala ashike omulilo oshoka iikulya mbika iha yi ya gwanene. Martin ta ti olundji aanegumbo mbaka oha ya pewa iikulya kombelewa ye nomathimbo gamwe kansela namwenengwomukunda oha ya kutha oshimaliwa moondjato okukwathela egumbo lyaGwakwedhi. Kansela ta lombwele Kundana kutya aanegumbo lyaGwaKwedhi hayo ayeke yeli monkalo ya tya ngawo. Oshikandjohogololwa she omuna ishiwe omikunda ntano ndhi na aantu yoludhi nduka.

Ta ti oyendji yomuyo kaye na omagumbo noondunda dhokulala dhi li nawa, yamwe nokuli kaye na omakumbatha. “Ngame omo handi yi moondunda dhoomeme moka –oomeme oshoka yo aavali yandje, ashike omakumbatha ito ga tala, yamwe nomatalashe kaye na, moondunda dhimwe ito vulu okuya mo oshoka sho to piti osheelo shondjugo, ezimba ota li ku dhenge, aantu noothewa kaye na,” kansela ta fatulula.

Martin okwa ti molwaashoka aakulupe ota ya ningi ya pewe oshimaliwa oshindji moomwedhi tuuka, ombelewa ye ota yi ka longelela kumwe nUuministeli wOkutidha po Oluhepo opo ye naanambelewa ye ya kuthe ko iipambu kiimaliwa yaakulupe mboka yeli moluhepo nonando ta ya kwata oshimaliwa, opo yeke shi longithe okuya ningila oondunda nokuya landela omakumbatha. 

1 COMMENT

  1. yakwetu.omukulupe iimaliwa mbi hakwata oheyilongitha shke? kamusela nayambidhidhe ngaa omukulupe gwe kalunga otemu yambeke,,

LEAVE A REPLY

Please enter your comment!
Please enter your name here