AaNathinge ya mono omeya

0
225

ONATHINGE – Aakalimo yomomukunda Onathinge nomikunda ndhoka dhili popepi odha kala ethimbo ele tadhi lili enota ndyoka lya kala lyeya lulila, oya kala noku kuga onkugo opo ya popilwe molwenota ndyoka lya kala tali ya hepeke unene.

Kansela gwoshikandjohogololo Onayena  Max Nekongo okwali a uvu onkugo yaakwashigwana ye. Molyomakaya goshiwike shaziko okwali a patulula oshitayimunino shoka shaza Omulonga-Onathinge-Ombuma. Ta ti aakwashigwana oya kala taya nyenyeta konima sho wumwe womuupomba mboka wali pomudhingoloko ngoka wali wa patwa kuNamwater omolwa oondjo ndhoka dha pitilila.

“ Oyendji oya kala taya hupu nuudhigu ondali nda longo ngaashi tashi vulika opo ndiya etele uupomba womeya , yo ya kale taya teke nokulongitha omeya gawo ya manguluka,ookansela oyo ewi lyoshigwana nongele aakwashigwana yetu yena oompumbwe ngaashi ndhika otatu kambadhala tu dhi yamukule,tse tu ya pe shoka twa pumbwa ashike shino otatu shi ningi ngele puna elongelokumwe nekwatathano ewanawa pokati ketu noshigwana,” Nekongo ta ti ngaaka.

Kansela Nekongo ta gwedhapo kutya okwa hala uupomba mbuka wu kale wuna ookomitee ndhoka tadhi kwatele komeho noku tulapo ewiliko opo ya kalekepo uupomba wawo mbuka. Ta ti na wu longithwe nawa wo wu kwatelwepo wu vule okulongithwa nokomapipi ta geya,ta ti na pu kale puna elandulathano.

Omolwa enota ndyono lya holoka nuumvo sho omvula inaayi loka nawa kansela Nekongo okwa ti ota ka kundathana nombelewa yomeya mOshikoto opo ya vule ya longekidhe omandoloma oshowo omatemba gokunwina iimuna yo yi kale nayo tayi nwethwa puupomba owo tuu mboka

Oshitayimunino shono sha patululwa omuna ngaashingeyi uupomba wuli uyali mbono wa tameka nale oku longithwa kaakwashigwana. Yamwe yomaakwashigwana mboka yali ya holoka kepatululo lyomeya ngaka oyali ya holola enyanyu lyawo,unene tuu sho ya kala yeli menota.

Aakwashigwana oyali ya tokola opo oshitayimunino shika yeshi luke edhina sho shi kale woo nasho shina mbushe. Tobias Hao Ashipala oye ali a lukilwa oshitayimunino shika no tashi ithanwa Hao Water pipeline. Ashipala okwa li a gandja omagano ku mbushe nopethimbo ta taambako edhina okwa uvaneke taka kwathela mpoka ta vulu , ta indile aakwashigwana yopomudhingoloko mpoka ya kwate nawa omeya, yo yaa ga longithe pamukalo omwiinayi.

LEAVE A REPLY

Please enter your comment!
Please enter your name here