Kalimbo okwa dhipagwa sho inaa mana mo ombiila –kuume ke tati

0
463

OSHAKATI- Kuume komumati ngoka anuwa a dhipagelwe komunangeshefa Maurus Valombola mo2013 ota ti kuume ke okwa dhipagwa sho a tindi omumana mo ombiila

Kuume kanakusa Benhard Kalimbo okwa hokololele ompangu yOpombanda mOshakati oshiwike shayi kutya okwa mono sho Valombola na Kalimbo oya li ya palamenathana konima sho Kalimbo a tindi okumana okahalasa kombiila.

Omunangeshefa, Valombola ngoka ta tamanekelwa edhipaga Benhard Kalimbo, pOkaku kaNyaluwilili ota okwa kala nokulolithwa oshinima shika mOmpangu yOpombanda yaShakati okuza omwedhi gwayi.

 Kalimbo ngoka a li ena omimvo 32 okwa si omolwa iilalo mbyoka a ningilwa a hulithile moshipangelo shepangelo shaShakati  momasiku 8 ga Febuluali 2013.

Valombola okwa kala mondholongo okuza esiku iigandja yemwene kopolisi omumvo 2013 sigo onena. Okwa li a tindilwa okwiifutilamo mondholongo sho a li a holoka komeho gOmpangu ya Mangestrata  pOutapi petameko lyiihokolola ye.

 Kalimbo okwa li anuwa a dhengwa noshiti shosinuka (pool table) pombaa yedhina MK Special Bar omanga anuwa inaa ka ponokelwa nokupumwa nohauto komutamanekwa Maurus Valombola.

Ignatius Alweendo mehokololo lye komeho gomupanguli  gwOmpangu yOpombanda mOshakati, Herman Januarie, okwa lombwele Ompangu ndjoka kutya ye na nakusa oye ya puundingisho yaValombola  lwopotundi ontimugoyi kongulohi konima yokunwa omahalasa gaali goTombo pokandingosho kalwe molukanda luukamba owo tuu mboka.

Konima yetata lyowili omutamanekwa pamwe nomutseyikile gwe oye ya wo pombaa ndjoka pahapu dha Alweendo.

Ihe ehokololo ndika olya patanekwa komupopiliko gwopaveta gwa Valombola omunaveta Pieter Greyling ngoka mokupulapula a pataneke oohapu ndhoka a ti omupopilwa gwe okweya pombaa ndjoka eli pamwe naalumentu yaali ndele ha nomulumentu gumwe ngaashi Alweendo a lombwele Ompangu. Greyling okwa ti oombangi ndhoka dha gandja uumbangi petameko odha ti omutamanekwa okwa li eende naalumentu yaali  sho a thiki pombaa ndjoka ongulohi yesiku lyoshiponga.

 Alweendo okwa ti omutamanekwa sho a thiki pombaa mpoka okwa landa ekende lyo Richeliu ye ta umbile oshimaliwa mo pool table.
“Omutamanekwa okwa tula iimaliwa moshitaafula shopool  konima yokumbesitela oRicheliu noku dhana uudhano wokudhenga uutanga naantu oyendji moka nangame nda kwatelwamo,’ osho Alweendo a hokololele Ompangu.

Ombangi ndjika oya hokolola kutya  konima sho uudhano wo pool table wa pu Valombola okwa lombwele aantu mboka ya li mombaa opo ya manemo omalovu gawo oshoka ombaa otayi pata.

 Ombangi oya tsikile ya ti  yo oya manamo omalovu mokahalasa kayo etayi ka tenteke kotoonmbanka, ihe Kalimbo okwa nyopitamo kashona mokahalasa ke ete ka tula ka nuwa etata koshipundi omanga inaa kambadhala okupitamo mombaa.

 Pethimbo ndyoka , Valombola ngoka a li a thikama mosheelo shokuya mo mbaa okwa lombwele Kalimbo a manemo omalovu ge , ndele nguka okwa ti okwa lombwele omutamanekwa kutya okwa gwanitha.
“Manga ta ende uuka pondje omutamanekwa anuwa okwa kutha oshiti shopool nokwa kambadhala  okudhenga nakusa, ndele nakusa okwa kwata oshiti shoka kombinga onkwawo. Mbaka yaali kehe gumwe okwa li a kwata ohulo yimwe yoshiti shoka, Valombola okwa li a kwata koshitako shoshiti ye Kalimbo okwa kwata ondungu yoshiti ndjoka ya li ontshona,” osho Alweendo a hokolola.

Okwa hokololwa kutya sho Kalimbo anuwa a ende uuka pondje yomweelo, Valombola okwe ke shi pondola okumu kutha oshiti shoka noku shi longita okudhenga Kalimbo pombunda. Ombinga ndjoka onene yoshiti shoka oya teka sho ya dhenge Kalimbo.

Ombangi ndjika  oya hokolola kutya Kalimbo okwa yi pondje nokupula Valombola kutya  ngele ogo omukalo gwe okudhenga aantu yaana shoka ya ninga.

“Onde shi uva ngaa kutya oho dhenge aantu. Oho dhenge ashike aantu inaa ye ku ninga sha,’Kalimbo anuwa osho a pula Valombola.

“Okuza mpoka Valombola okwa pula ngele Kalimbo okwa hala okwi iyetela uupyakadhi, okwa hilimo ondjembo ye nokuumba uukitha kombinga ndjoka kwa gama Kalimbo ngoka pethimbo ndyoka aadhika pondje,’ osho Alweendo a hokolola .

Ombangi ndjika oya hokolola kutya  konima yokuumbwa Kalimbo okwa thenene momilema ye Valombola te mu landulilemo anuwa. Ombangi oya yi kombaa yimwe hoka ya ka hokolola shoka shaningwapo.

Iihokolola otayi tsikile natango mOmpangu yOpombanda yaShakati sho oombangi dhimwe tadhi ka gandja omahokololo gadho.Iihokolola mbika oya tamekele omwedhi gwayi.

Omutseyiveta Lucious Matota oye ta kalelepo Epangelo.

LEAVE A REPLY

Please enter your comment!
Please enter your name here