Ohorongo Cement ya gandja oosamende koshigwana omagano

0
179

ONGWEDIVA-Ehangano lyaNamibia ndyoka hali longo osamende lya tseyika nawa Ohorongo Cement olya gwanitha po euvaneko lyalyo sho lya gandja ooshako dhosamende 720 koshigwana shomOmusati omasiku ga ziko.

Ooshako ndhoka odha gandjelwa poombelewa dhElelo lyoshitopolwa Omusati mOutapi.

Oosamende dhondjundo yookilograma 50 moshako kehe odho oshitopolwa sheuvaneko lya ningilwe kehangano lyOhorongo Cement kutya pethimbo lyedhimbuluko lyemanguluko lya Namibia lyomimvo 25, ndika otali ka gandja ololi yuudha ooshako dhosamende koshitopolwa kehe shomiitopolwa 14 yomevi lyOmapenda.

Pahapu dhomuwiliki gwOhorongo moshitopolwa shelelo, Rodolf Coetzee, ooshako 750 dhosamande odha gandjwa nelalakano oku kuthombinga meyambulepo oshowo mehumokomeho lyoshilongo.

Coetzee okwa ti ehangano lye otali ka gandja ootona omilongo ndatu nahamano dhosamende koshitopolwa kehe sha Namibia. Oshilongo shika osha topolwa miitopolwa yopapolitika yili omulongo niine.

Oosamende ndhika odha gandjwa nelalakano okulongithwa moopoloyeka dhoshigwana ngaashi oosikola, omahala gokulangeka aakiintu yeli momategelelo manga ya tegelela okuka pulumutha oshowo oopoloyeka dhilwe ndhoka tadhi gandja uuwanawa koshigwana nena nomo nakuyiwa.

Okupitila mOmbelewa yOmuprima Minista Oongoloneya adhihe dhiitopolwa  odha pewa oshinakugwanithwa okutothamo oopoloyeka ndhoka tadhi pewa oosamende ndhika opo dhi dhi longithe miitopolwa mbyoka.

“Ndika halyo epungulo lyotango ndyoka ehangano lyetu tali ningi moNamibia okuza tuu nkene twa tamekele okuhambula osamende konyala omimvo ndatu dhapiti, oshoka ehangano olya gandjele nale konyala omakwatho gongushu yi vule oodola oomiliona hamano okukwatha oshigwana shaNamibia koombinga noombinga,” osho Coetzee a ti.

Ehangano oli uvite etumba kutya ooperesenda 98 dhaaniilonga yalyo ayehe oomvalele dha Namibia. Oli uvite uuntsa molwashoka shika olye shi pondola meni lyethimbo efupi, noshikwawo ndika ohali gandja woo oompito dhiilonga momahangano galwe ngoka ha ge li pe omayakulo oshowo ngoka haga andjaganeke noku landitha osamende ya longwa mofabulika yOhorongo.

Okwa ti nonando Ohorongo oyo ehangano eshona nenge enona moshimpungu shika shuuhambudhi, lyo ohali kambadhala okugandja sha koshitopolwa shelongelokumwe mokati komahangano goshigwana naangoka gopaumwene no hali yambidhidha epangelo momalalakano galyo  ngaashi ngoka gondjodhi yomumvo 2030 oshowo omathaneko geyokomeho omatine.

Ngoloneya gwaMusati Erkki Endjala sho a taamba omagano ngaka okwa ti otaga ka kwathela meyokomeho neyambukepo lyoshitopolwa oshowo oshilongo muunene washo.

LEAVE A REPLY

Please enter your comment!
Please enter your name here