Oshilando sha tyapula omithigululwakalo

0
246

WINDHOEK-Oshituthi shomithigululwakalo sha /Ae //Gams Arts and Cultural Festival osha li shuudha omainyanyudho molupe lwomusika, iiyulikwa yomomapandaanda, omathano ga hongwa momamanya, iinyandwa, iikulya yopamuthigululwakalo oshowo okuhokolola uutewo. Mbika oyo yimwe yomiinyanyudhi mbyoka aakalimo yaVenduka ya mono yu ulukilwa oshowo ya nyanyudhwa nayo uule womasiku gatatu goshituthi shokomumvo shika hashi longekidhwa kElelo lyoshilandopangelo. Oshituthi shika osha li shaningilwa po Zoo Park mokati koVenduka.

Oshituthi shika osha li sha dhanwa kohi yoshipalanyolo, Diverse Cultures, One Vision, aakalipo oya mono noku nyanyukilwa omaudhano guulikwa koongundu dha yooloka dhopamuthigululwakalo. Oya li ya mono uudhano mboka wa dhanwa kongundu yopamuthigululwakalo gwaaMafwe yedhina Limbambangela Cultural Group, a Mafwe Living Museum ndjoka hayi ulike onkalo yawo ngaashi yili esiku kehe. Ataali oya li wo ya mono oongundu dhomithigululwakalo dho Mbunza Living Musem, Amaburuxa Cultural Group noshowo  Ju/’hoansi Living Museum ayehe mboka yuulike shoka haya longo esiku kehe monkalamwenyo yawo. Ongundu yo Ju/’hoansi Living Museum oya ulike nkene haya tema omulilo, haya yohoha, haya tungu oontungwa dhawo  oshowo okupanga mboka taya ehama paunamiti wopamuthuigululwakalo.

Nonando oshigwana oshindji kasha li sha holoka pomauliko ngaka, shika osha ulike kutya  oshi li mondjila okuninga  oshihili shaantu kombinga yomithigululwakalo oshowo iiyulikwa yopaunongothano melandulathano lyomainyanyudho ndyoka Muni gwa Venduka ha longekidha.

Aalandithi yiilongomwa yi ili noyili yopamuthigululwakalo nuunongothano oya li taya landitha iinima yawo pethimbo ndyoka. Yamwe yaamboka yi ile poshituthi shika oya li ya landa iinima mbyoka omanga yalwe oya li ashike ye yi tala nawa yo yalwe oya li ya pulakene ashike omusiki ombwaanawa.Oshiithanene shomalwaala omawanawa oshowo omithigululwakalo tadhi fuula osha edhilwa nomusiki Olyomakaya kaahikingalo mwakwatelwa S-man, One Blood, Tswazis,Atushe, Shotgun, Munkee oku tumbula po ashike yamwepo.Molwashoka oshituthi osha li inaashi kalwa kaakalimo oyendji, monakuyiwa aalongekidhi yasho oya pumbwa okushi tseyitha nawa kuyele opo aakalimo ya vule oku kala poshituthi shika. Nando ongaaka mboka ya holokele oya li yuudhitha ehala ndyoka no ya pulakene omusiki ombwaanawa.

Shika osha tegelelwa monakuyiwa shi ka ninge oshiningwanima tashi hili aatalelipo opo ye ye okutalelapo oshilando noku ulukila aatalelipo iitalendi mbyoka yi li muAfrika ngele tashiya pomithigululwakalo.

LEAVE A REPLY

Please enter your comment!
Please enter your name here