Minista Ithana a talele po egongalo Omulondo

0
371

OMULONDO – Minista yIikwameni lyoshilongo nEtonatelo lyoKoongamba, Pendukeni Ivula-Ithana Osoondaha ya ziko okwali a talele po egongalo Omulondo, nokuuvu omambo pamwe naakwanegongola yaa hoka.

Minista Ithana okwali eende pamwe na Willem Amutenya, Veiko Haimbondi ngoka iinekelelwa ewiliko lyokutunga omatungo goongeleka oshowo okudhithikamithapo, omuniilonga moRadio yOshiwambo yo NBC, Angula Pohamba, kansela gwoshikandjohogololo Olukonda Darius Shikongo oshowo omunangeshefa Prince Shiimi.

Etalelepo lyaMinista olyali lya ningwa konima sho egongalo ndika lyali lya shaina uukuume na minista Ithana, nokwali a talelepo egongalo ndika mo 2012 mono ali eli gongelele oshimaliwa nelalakano li gwedhele ongeleka omawawa oshoka oyali oshona naakwanegongalo ihaya gwanamo we unene tuu pethimbo lyomatango omanene niituthi.

Elongelokalunga ndyono lya ningilwa kohi yomuti omolwa ongeleka ndjoka tayi opalekwa olyali lya ningwa kOmusita Tomas Uushona omanga Omusita Johannes Haufiku ngono a kalelapo Ombelewa yaakulupe a ningi euvitho. Aakwanegongalo oyali ya holoka momwaalu omunene kelongeloKalunga Osoondaha ndjoka.

Minista Ithana okwali a holola kutya oyali ya longekidha olweendo nduka lwowina opo ya talelepo ishewe egongalo Omulondo opo ya tsikile mpa yahulilile mo2012, yo ya tale kutya okuza esiku ndyoka ya zile po egongalo olya longopo shike, nelalakano opo ya manithe etungo lyongeleka, mono Minista a holola kutya okuna omukumo kutya ayihe otayi ka enda nawa.

“Onda hala ndi pandule omusita gwegongalo pamwe naakwanegongalo ayehe mbono ya longo nuudhiginini noye shi ulike kutya oyi itulamo metungo lyongeleka, shino otashi ulike iiyimati iiwanawa naashino osha ningwa konima sho twali twa talelepo egongalo Omulondo mo2012, osha nyanyudha ndje okutala etungo lyongeleka ndika lya thikama naashino osha pendje omukumo ndi mone kutya ongeleka ndjika otayi ka kala ya tungwa yapwa kuyele, shino osha yela kutya iiyimati yiinyangadhalwa yetweni otayi longithwa naanaa ngaashi yuunganekwa noya thanekwa,” Minista Ithana ta ti ngaaka.

Ithana ta gwedhapo ta ti okwa hala opo  aakwanegongalo ayehe ya longe nuudhiginini , yo ya manithe thilu ongeleka ndjika opo aakwanegongalo ayehe ya kale taya gwanamo mongeleka yo kaaya uvile we pondje, ko ku hwepopalekwe woo etaandelitho lyohapu yaKalunga. Ta indile ongerki yi kwatathane nepangelo ko ku yandwe omashongo gi ili nogi ili, ngoka unene ga taalela aagundjuka ngaashi ngoka gomadhipagathano nokwaana ombili mokati kokuume oshowo momagumbo ombili oya kanamo noya pumbwa oku galikanenwa yo aantu ya pangelwe aluhe kuyo. Ta ti ongerki mekwatathano nooprograma dhepangelo nadhi kondjithe omaupyakadhi agehe taga holoka.

Esiku ndyoka okwali kwa gongelwa oshimaliwa shooN$33 075-35 , shino tashi ka kwathela opo ongeleka ndjika yi kale yapwa okutungwa mbala.  Mwene gwomukunda Uuyoka , Kleopas Indongo okwali a pandula Minista nosheendo she , mbono yeshi ningi oshipu opo ya vule ku thikamithapo ongerki yawo nokuyi tula omawawa yi kale yili pamuthika gwoshinanena ngaashi oongerki odhindji tadhi tungwa.

LEAVE A REPLY

Please enter your comment!
Please enter your name here