MoLüderitz otamu ka tungwa omatala

0
254

Ku Tuulikki Abraham

Lüderitz – Elelo lodoolopa ya Lüderitz ola faneka tali ka tunga omatala okulandifila, opo ovanangeshefa ovo hava landifile ashike mongalangala va mone onhele opo tava dulu okukala hava landifile.

Ovanambelewa osho yoo okansela vomelelo lodoolopa yaLüderitz oshivike shaya ova kala noku ningila ovakwashiwana oyoongalele, nelalakano oku va shiivifila omafaneko oo tava tula moilonga moku yambulapo odoolopa moshimaliwa shi fike pooN$21.5 omilliona shomutengenekwa mwaalu womodula 2015/2016.

Momafaneko omo omwakwatelwa nee oprojeka yoku tunga omatala osho yo onhele yokulondekela eebesha.Elelo lodoolopa ola kala yoo lihena onhele yokulondekela eebesha, oyo kwa fanekwa ta ika hovelwa okutungwa mu Auguste wodula yoneudo.Onhele oyo ya kala ha ilongifwa okulondekela eebesha efimbo alishe olo, onhele yopaumwene.

Moshimaliwa omo otamu ka tungwa yoo onhele ya kadimamundilo, osho yoo tamu ka longifwa yoo okutula ondjila yoteya okudja pofikola po Diaz oku yuka keembelewa da Natis.

Elelo lodoolopa olashiivifa yoo kutya moshimaliwa osho tuu osho otava ka longifa mo yoo okutula omayakulo konhele oko kuna omaumbo oShack Dwellers Federation.

Onhele yolukanda lo Area 7 oko kuna ovakalimo vali ashike ngeno vena okukalako ,vo vaka tembulweko, elelo olafaneka talika wapaleka onhele oyo opo idule okutungwa omaumbo.

Mo yoongalele omo tuu omo omwashiivifwa yoo kutya ovakulupe oshoyo ovanhu ovo vena omaulema ndele ovanamaumbo, ovahovelele okuli nyolifa keembelewa delelo okuhovela omwedi waya, no veli paife tava futu ashike elongifo lomeva, oo va longifa ndele itava futu vali omayakulo makwao okukufapo oimbodi nosho tuu.

Mo yoongalele omo tuu omo ovakwashiwana ova shiivifilwa yoo kutya omayakulo mahapu modoolopa otaaka wedelwa okuhovela mefiku lo tete la Juli, omo omeva taaka wedelwa 10%, omaplakata omo mapandavanda nao otaaka wedelwa 10%, oshoyo omalusheno na ikwao.

Secilia Iitula umwepo waavo hava landifile mongalangala okwa tumbula kutya okwa pandula unene eshi elelo lodoolopa la faneka okutunga omatala oku landifila.

Iitula ta tumbula kutya omatala ngee okwa tungwa, otashi kakala eameno kuvo oshoyo koilandifomwa yavo oyoo hava landifa. Ta ti omhepo yondwi, ondau oshoyo omutenya noutalala ohaupwile ashike komalutu avo, onghene ota pandula unene ngee omatala okwa ka manifwa diva opo va dule okumona mo onhele omo tava kala hava landifile.

LEAVE A REPLY

Please enter your comment!
Please enter your name here