Omanima gaashiwike taga thipi iikombo ombinzi

0
383

AMUTEYA – Aakalimo yomomikunda dhimwe ndhoka dha kunduka  Onyaanya  oya limbililwa molwa omanima ngoka kaa ga shiwike anuwa ta gali nokuthipa iikombo ombinzi.

Yamwe mboka ya gandja ehokololo lyawo aakalimo yomo Amuteya ya ti otaya kanitha iikombo yawo oyindji mbyono hayi penduka owala yasa yo ya thipwa ombinzi komanima gaashiwike go ihaga monika.

Oshiwike sha ziko megumbo lya Absalom Emvula omwali anuwa mwa penduka mwa lika iikombo itano, mono shimwe sha likila koshigunda na yimwe ya likila melundu.

“ Otwa lulilwa oshili komanima ihaaga monika ta ga li iikombo yetu noku yi thipa oombinzi, limwe lyomomasiku oshiwike sha ziko otwali tu uvu oombwa tadhi gwedha uusiku ashike inatu penduka tu ka tale kutya oshike tashi dhi gwedhitha, sho twa penduka ongula kwasha otwa li twa adha iikombo ya lala yasa nale ashike sho tweyi tala nawa otwa mono kutya oya lika noya thipwa ombinzi,” Meme Emvula ta ti ngaaka.

Ta hokolola kutya oya kala noku talatala ya mone ando ngele otaya mono omanima ngoka taga hokololwa gena omakondo gafa goombwa, ashike inaya mona mpoka ga uka, ta ti megumbo lyawo omwalika iikombo itano na yilwe ya lika pomagumbo gopuushiinda noshowo pomikunda dhopuushiinda.

Meme Emvula ta gwedhapo kutya oshinima shika shomanima ta gali nokuthipa iikombo ombinzi oshali woo sha ningwa omvula ya ziko mu Kotoba mono iikombo oyindji yali ya lika komanima, nogali ga mwenapo opo ihe anuwa ga tameke nuumvo ishewe.

“ Oshinima shika oshetu tilitha unene tse otuna omaipulo ogendji oshoka omanima ngono otaga galuka owala natango geye ga lyepo iikombo yetu,gogene ogena omakondo gafa goombwa ashike sho twa tala nawa ka ge shi oombwa oshoka ando odhali oombwa ando ohadhi lipo onyama dho noombinzi ando ihadhi thipwamo , shino oshetu ulukile kutya opuna owala omanima gi idhingilila omikunda dhetu no ga hala ga manepo iimuna yetu miigunda,” Ta gwedhapo ngaaka.

Aanamukunda yamwe taya hokolola kutya muMai nuumvo aanegumbo ya Andreas Petrus mOnyaanya oyali ya penduka sho yu uvu oombwa tadhi gwedha uusiku naasho ya penduka anuwa oyali ya adha enima lili poshikuku shoondjuhwa, oyali yeli tidha sigo yeshi pondola okuli dhipaga.

Taya gwedhapo ihe kutya omwedhi ogo tuu ngoka natango oyali ya dhipagapo enima limwe lya adhika  poshikuku shoondjuhwa natango.

“ Shino oshali she tupe ethano kutya nani omanima nga ta gali iikombo no kuyi thipa ombinzi momagumbo getu, kageshi oombwa ashike ogafa oombwa go ogenapo uulungu uule , inatu mona nale omanima gatya ngaaka ta ge tu kanithile owala iimuna yetu,” Yamwe yomaanamukunda taya hokolola ngaaka.

LEAVE A REPLY

Please enter your comment!
Please enter your name here