‘Onda nangala nomulumenhu mukwetu molwa oluhepo’ omunyasha ta ti

1
520

ONGWEDIVA – “Ame onda nangala ashike naye shaashi onda dja poluhepo, na onda pumbwa oshimaliwa shokulihongifa, opo ndi dule oku kwafela oundenge vange. Aame oshiveli shameme, no ita ndi dulu oku efa omhito yelihongo handi i pewa”.

Aa oo omatumbulo omumati weedula 20 womwaavo va lopota nokutulifa moipandeko omuhona wavo Shatika Ipinge oo vati kwali heva fininike nokuva ningila omatilifo opo va ye naye moixulo youshenge.

Ipinge okwali omuwiliki nomunani wehangano ledina Diabetes Association of Namibia (D.A.N) lili mOngwediva. Mo DA.N omo mwa li mwakutwa ongudu yovanyasha ovaliyambi, mwa kwatelwa ovamati, vahapu vomuvo vadja keenhele dokokule, unene tuu kOmusati nokoKunene. 

Ovamati vati ova kala hava nangala ponduda yoshipeleki ya kalela ombelewa yavo, omo yoo mwali hamu nangala Ipinge omanga ovakainhu hava nangala konduda ili hanga etata lokilometa okudja pombelewa. Vavali vomoumatyona veli vane ovo va popya na Kundana ova hokolola kutya ova ya moixulo nomulumenhu oo, lwoikando ya yooloka, na okwa kala te li humbata onga oye omukainhu omanga vo ovo ovalumenhu.

Okamatyona kamwe oka ti Ipinge okwa kala nokuka kondjifa efimbo lile, ashike shaashi kakali kekwetwe komahalo okwa kala ta kondjifa opo eka pe eepela doku yandja omahalo oipala. Molwaasho oka kala noku mu henuka, Ipinge va ti okwa handuka ndele teka taataa mo moilonga oule womafiku onhumba. Vati okwa kala ta heke ovamati ava opo va ye naye, nookaume kaye moixulo, teva udanekele kutya ote va monene omakwafo oshimaliwa opo veke lihonge koUkraine. Mokati komadina oo a lombwelwa Kundana omwa kwatelwa ovapolifi vavali.

Umwe womovalumenhu ovanyashaelela oo a yandja edina laye kuKundana okwa hokolola nghee efiku laye lotete moD.A.N, ehangano li he fi lopapangelo li lile po okuyandja omakwafo kovanaudu vomukifi wofyuuka la shituka ondjodi ii.

“Oufiku oo tuu oo, okwa ufana nge konduda yaye ndele ta kala nokupula nge oinima ina sha noushenge. Okwa pula nge ngee oha ndi dulu oku ya momilele nomashenge, eshi nda ti ita ndi dulu okwa lombwela nge kutya onda dopa ekonaakono, noku taataa nge mo monduda yaye.

“Efiku la landula ko okwa ufa na nge vali mondunda yaye, ta tameke ta ulikile nge eemuvi domashenge. Okwa kala ta ningi ngaho omafiku mahapu.

Eshi nda ka loloka onda ka tokola ashike opo ndi nangale naye, ame ndi mu likufe. Ongula okupendukila efiku olo nda nangala naye, okwa ninga nge nale nokuli omuhona, ndi kale handi tonatele (supervisor) vakwetu.

Oku dja opo okwa kala nee ha ufana nge konduda yaye keshe onguloshi, nefiku ina ndi hala okunangala naye, oha tumu nge opo ndi ifane mo omumati umwe monduda yetu, ngee okwa anye ta tumu mo vali mukwao. Otwa kala ashike tu li kepaya, ta ningi ashike a ufa na mo umwe, ye ta ifana mo mukwao. Ngee owe mu anye filu filu, ote ku totele eendaka ndele teku taataa.

“Ame onda ka loloka nee oinima youshenge, shaashi okwa ka kala a lambalala nge unene, iha efa nge vali. Onda tameka oku anya ko konduda yaye. Onda lombwela yoo meme kombinga yonghalo omo nde li hanga muyo pamwe navakwetu.

Ashike pefimbo tuu opo naye okwe tu totela eendaka noku ufana ovakulunhu vetu vati shaashi okwa li a hala etu taatae moipafi yavo. Omanga tuli moihokolola, opolifi oye uya noku mu kwata po. Mbela opena nale ou a hangika nale a nofwela ko opolifi,” umwe womovamati ta hokolola ngaho.

Ipinge okwa holokele nale mOmhangulilo yaMangestalata omo a anyenwa opo e li futile mo. Okwa teelelwa vali opo a holoke momafiku 20 July 2015. 

1 COMMENT

  1. oshili shili oinima tayi ningwa moshilongo shetu oya kula. ehulilo lounyuni olafika omwene tala oshiwana shoye neho lyolukeno…

LEAVE A REPLY

Please enter your comment!
Please enter your name here