Oshituthi shuudhano woongonyo poRamatex Hall

0
280

WINDHOEK –MuAuguste oohandje otadhi ka halakana nokuuka mombanda poshinyanga sha Ramatex pethimbo Nestor Sunshine Tobias Boxing Academy tayi ka kala nuudhano woongonyo kohi yoshipalanyolo  ‘Night of Champions’ Boxing Bonanza. Muudhano mbuka otamu ka kala aadhengingonyo ookapyoko moshikondo shuumbokisi moNamibia.

Mbaka ongaashi oo Paulus ‘Hitman’ Moses, Paulus ‘Rock’ Ambunda, Betuel ‘Tyson’ Uushona mboka oyo taya ka kwatela omalugodhi komeho moka aadhengingonyo taya ka umbathana dhakahandja ongulohi ndjoka.

Aambokisi omanyakwa omagundjuka ngaashi Japhet “Thin Man” Uutoni, Julius “Blue Machine” Indongo, Walter “Executioner” Kautondokwa, Nathaniel “Sir” Kamati, Mike “Silent Assassin” Shonena, Sacky “Izinyoka” Shikukutu na Jeremiah Nakathila na yo oye li oshitopolwa shuudhano ongulohi yesiku lyotango lyomwedhi omutihetatu.

Pahapu dha Nestor Tobias ngoka oye omulongekidhi guudhano mbuka, aatali naaholi yombokisa otaya ka tegelela iilonga iiwanawa yaadhengingonyo mboka taya kuumba oongonyo tadhi fuula. Okwa ti omalongekidho omolwuudhano mbuka ogeli metifa.

“Tse otwi ilongekidha okupa aayambidhidhi yetu  omainyanyudho omawanawa, okuya pandula omolweyambidhidho lyawo ndyoka lya kala itaali tengauka omumvo nguka, naashika osho tu shi okulonga nawa. Onkene otwa hala aayambidhidhi yetu oshowo aatali yuudhano wombokisa ya holoke momwaalu itaagu vulu okuyalulwa oku tu yambidhidha oshowo oku nyanyukilwa nokutyapula uudhano wopomuthika guuyuni muka moNamibia,’ Tobias osho iindile.

Uutekete okupita pomweelo womuntu kehe owo ooN$50.00 naamboka waasimani owo ooN$500.00, naambuka otawu landwa poCompu-ticket apehe mpoka hadhi adhika moshilongo ashihe.

LEAVE A REPLY

Please enter your comment!
Please enter your name here