Ospana yoBrave Warriors ota yi ka dhana nawa ishewe, Mbidi a ti

0
244

Windhoek-Nonando ospana yetanga lyokoompadhi ya Namibia oya dhengwa okoola yimwe ku Niger muudhano wawo ehuliloshiwike lyayi, Omuperesidende gwolutu oluwiliki lwetanga moNamibia NFA , Frans Mbidi okwa ti mbaka otaya ka dhana nawa nokusindana muudhano wawo na Senegal oshowo Burundi.
Namibia okwa ka dhanene ko Niamey sha Niger muudhano opo a mone ompito yokupita okuya kuudhano wiigwana yAfrica nenge AFCON womumvo 2017 mboka tau ka dhanenwa ko Gabon.

Muudhano mboka oospana dhiilongo mbika iyali odha li dha kondjo nelalakano opo kehe yimwe yi mone esindano medhingoloko ndyoka lyotango mongundu ya K. Mongundu ndjika omuna Namibia, Senegal , Niger na Burundi. Senegal oye ngashingeyi eli pombanda niitsa itatu oshowo ena ookoola ndatu konima yokudhenga ospana ya Burundi ookoola ndatu mu yimwe. Nguka okwa landulwa ku Niger ena iitsa itatu oshowo okoola yimwe ayike.Namibia na Burundi ayehe oye li pevi kehe gumwe okuna onola.

Molwashoka Burundi okwa tulwa ookoola odhindji oye eli kohi yongundu ndjika methigathano ndika.

Omusamane Mbidi okwa ti okuna etegameno kutya Namibia ota ka ngungumana eta dhana nawa muudhano we na Senegal mboka wu li ko mu Septemba nuumvo moVenduka.Okwa ti ye okuna einekelo enene momudheuli gwoBrave Warriors, Ricardo Mannetti a ti okuna ontseyo oku thigathanapo nospana kehe kutya ndjika onene yi thike peni.

“Nonando otwa dhengwa mbuka owo uudhano wetu wotango moonkambadhala opo tu pite oku ka dhana kekopi lyiigwana yAfrica, onkene okuyele unene okutameka nale noku gandja uusama kaamati sho yafa inaa ya longa nawa.

Ondi itaala kutya aamati otaya ka talulula nkene ya longo medhingoloko ndyoka opo ya vule okudhenga ospana ya Senegal  ndjoka tayi ya koVenduka mu Septemba oshowo Burundi ngoka ta ka kondjwa naye mu Maalitsa 2016.Onkene ondina etegameno kombinga yaashika’ osho Mbidi a popi uudha einekelomwene.

Ospana yo  Brave Warriors oya thiki Metitatu kegumbo na oyali meilongekidho oku idheulila uudhano wayo nospana ya Zambia okukondjela oku ka kuthombinga muudhano waadhani haya dhanene megumbo moAfrica mboka tau ka kalako omumvo tuuka koRwanda. Uudhano pokati kaNamibia na Zambia ouliko Osoondaha ndjika pokapale ka Sam Nujoma mOkatutura.

LEAVE A REPLY

Please enter your comment!
Please enter your name here