Aadhani ya tilitha kutya  otaya tembuka molwepandulo lya shonopekwa

0
239

Windhoek –Opena uupyakadhi mokati kospana ndjoka yili enyakwa lyoliha yo MTC Premiership, African Stars sho aadhani yamwe aakuluntu nenge aakulu ya tilitha kutya otaya ka thigapo ospana ndjoka molwashoka anuwa inaya pewa iimaliwa yili nawa yepandulo omolwa okudhana nawa uule womumvo aguhe guudhano gwo 2014/2015.

Aadhani mbaka yuuvite nayi oya ti oya geya oshoka iimaliwa yawo oya kuthwako kewiliko nonando yo oye yi ilongela mokudhana yaana ezimbuko uule womaudhano agehe geli 30 sigo oosho ya sindana ekopi ndyoka lya kala aluhe li ya li kokule.

Mbaka oya lombwele Kundana taya lundile ewiliko lyospana ndjoka kutya anuwa ndika olya tete omapandulo gawo nenge obonasa yawo molwokusindana oliha yaNamibia yo MTC. Oya ti konyala etata lyaadhani olya yi ashike noo N$1 000 sigo ooN$3 000 molupe lwobonasa  omanga omudhani ngoka a mono obonasa yili pombanda oongoka a futwa ooN$14 000.

Aadhani mboka yuuvithwa nayi yo ishewe oyi indile opo yaa popiwe komadhina oshoka oya tila oku kwatelwa onkone  oya geya  na oya ti otashi vulika ya thigepo ospana ndjoka noku ka konga uuhupilo palwe mpoka tashi vulika taya ka pandulwa hwepo omolwiilonga yawo.Oya ti otashi vulika ya thiminikwe ya ninge ngaaka oshoka oya vulwa ngashingeyi oshoka ewiliko lyospana ndjika aluhe olina omahilathano niilonga inaa yi yela moombelewa dhayo.

“Shika kashili nawa kutse unene tuu sho tse oyendji twi ikwatelela miimaliwa mbika okuhupa komwedhi, tse ishewe otuna omafamilia hatu ga  sile oshimpwiyu, otuna aanona noshowo ohatu futile omahala getu mpoka hatu zi. Onkene otatu hupu ngiini muuyuni mbuka ngele itatu pewa shoka twiilongela. Oyendji yomutse otuuvite kutya shoka tatu vulu okuninga osho okuthigapo ospana ndjika noku ka konga iilonga palwe mpoka peli hwepo, ”osho omudhani gumwe omukuluntu mospana ndjika a ti.

“Eshongo ndika otwe li popya nale nakapitiya gwospana, , Pat-Nevin Uanivi, ndele omumati nguka okuna egamo oku kutha ombinga yewiliko lyospana no ine tu pulakena nenge a pulakene omanyenyeto getu.         Lombwela ndje mumwameme kutya oto vulu okulandamo shike mobonasa yooN$1 000? Shika omanyami gogene” osho gumwe gwaamboka ya geya a tumbula.

Kundana okwa kundana  nawa kutya okwa li oongodhi tadhi dhengelwathana pokati kaadhani mbaka yaa uvite ombili naanambelewa yewiliko lyospana ndjika, moka mbaka ya lombwelathana omalaka itaa ga vulu okunyanyangidhwa.Ospana yo African Stars oya taamba oo N$1 omilliona yimwe sho ya sindana oliha yoMTC/NPL.

Sho omuwiliki gwospana ndjika Sieggie Mujoro Veii a pulwa a tye sha komalundilo ngaka okwe ga ekelehi, ati aadhani mboka otaya kongo ashike okuuvika miikundaneki inaashi pumbiwa.

“Mbyoka iifundja kapena omudhani a futwa obonasa yoo N$1 000 kakele ashike kaadhani yatatu mboka ya futwa ashike ooN$500 kehe gumwe oshoka mbaka oya li ya gandjwa koospana dhimwe hoka yo ya li taya dhanene koloana. Aadhani yalwe oya li ya futwa ngaashi sheeleka iilonga yawo shiikwatelela komaudhano ngoka ya dhana nopamayalulo getu kapena nando omudhani a yi kegumbo nobonasa yi li pevi lyooN$3 000,” osho omuwiliki nguka a popi a thitapo.

“Osha nyolwa shayela mokondalaka yawo kutya ooperesenda 25 dhiimaliwa mbyoka ya sindanwa oyina okupewa aadhani omolwokusindana ekopi ndyoka. Sho osho twa landula moku ya futa oobonasa dhawo.Omudhani kehe okwa futwa shii ikwatelela komaudhano ngoka ye a dhana. Onkene ngele opena aadhani yamwe ya li ya tegelela okufutwa iimaliwa yi thike pamwe naamboka ya dhana omaudhano ogendji nena mbaka otaya ningi omashendjo.”

Kombinga yoongodhi ndhoka dha dhengelwa aanambelewa ya African Stars kaadhani, pehulilo lyoshiwike Veii-Mujoro okwa zimine uuvite nayi kutya osho shili oshinima shoka osha ningwa na ye okwa tukagulwa komudhani gwokomeho Heinrich ‘Gazza’ Kazeurua pethimbo ya li taya nyenyeta konyala pwaana ngoka ta pulakene mukwawo.

“Eeno osho shili kutya aanambelewa yamwe yomutse otwa tukwa dhoshili  kaadhani. Ngame onda tukwa shuukilila ku Gazza (Kazeurua), ngoka a tumbula ndje nameme noshowo kwa tsikile okutumbula ndje naakuluntu yandje. A shongo ndje shili ndali oku idhidhimika noku kambadhala oku mu fatululila nawa nkene obonasa hadhi futwa.,” Mujoro-Veii a gwedhapo.

 

LEAVE A REPLY

Please enter your comment!
Please enter your name here