Aakalimo yomomukunda Indongo Yakeelu ota ya si enota

0
279

ONANKALI-Aakalimo mboka yeli momukunda Indongo Yakeelu, moshikandjohogololo Omuthiya moshitopolwa shaShikoto onkene ta ya si enota, nonando oyafuta iimaliwa yawo ya pewe omeya, oomvula mbali dhapiti.

Yamwepo yoomakalimo mboka kaya uvite ombili no ta ya ti yo otaya mono iihuna kenota ongaashi, Natanael Stefanus, na Rosalia Nampweya, mboka ya holola kutya ohaya ende oondjila oonde okukakonga omeya omanga yafuta nale oowili dhawo, nooN$1200 lwaampoka ye dhi futile mo 2013.

“Omwedhi gwaziko otwali ishewe twa pula ombelewa yOnankali kutya omeya getu ota ga thiki uunake, ashike otwa yamukulwa ashike kutya otaya galula iimaliwa yetu mbyoka twali twafuta nale. Oshili tse oyamwe mboka twa mona iihuna kenota, otwa hala eyamukulo kepangelo. Ano iiyimati yoshilongo shetu otatu ke yi lya uunake,” Stefanus ta pula.

Nampweya okwa gwedhapo ishewe ta ti yo ngashingeyi aakulupe, no ihaya vulu we okweenda oondjila oonde okukonga omeya ngaashi shito. “Tse otwa hala ashike ombelewa yOnankali yi talepo nawa noyi tupe eyamukulo lyamanguluka. Paife opo ya hala yetu galulile oshimaliwa shi twa futa pwapita ethimbo alihe ndyoka tse ishewe otwa fula nale ominkanka dhetu no twa landa nale ominino ndhoka dhomeya,” Nampweya ta gwedha po ishewe.

Gumwepo gwomaanambelewa yomOnankali, ngoka eli oControl Administrative Officer, Basson Keeja, okwa hokololele oshifo Kundana ta ti aakwashigwana mboka ya li ya ninga omaindilo gomeya okwali ye shi ninga papuko, na ishewe momunino ngoka mwali tamu kuthwa omeya kaakwashigwana ka gwali tagu vulu okupomba omeya ga gwanena aakwashigwana ayehe.

Okwa ti nonando omuze ominino dhomeya dhaa kwashigwana mboka , itashi ka kwatha sha. Okwa indile opo aakwashigwana ya tegeleleko kashona manga oshitopolwa shawo tashi etapo elunduluko limwe. “Aakwashigwana mboka itaaya vulu okutegelela na ya holokele pombelewa yetu opo ya peweko iimaliwa yawo mbyoka yafuta, nenge ya tegelele sigo moshitopolwa moka tamu tulwa ominino ndhoka tadhi vulu okupombela omeya kaakwashigwana ayehe,”  Basson ta ti ngaaka.

Okwa gwedhapo ta ti aakwashigwana naaye kombelewa ndjoka yokOnankali opo ya ka uve uuyelele auhe wagwedhwapo nenge yadhengele konomola 065 286320.

LEAVE A REPLY

Please enter your comment!
Please enter your name here