Aalongi mOshigambo ya hangana

0
372

ONDANGWA – Aalongi oshowo aakuluntuskola yeli 440 moshikandjolongo shaShigambo oyali ya gongala mEtitano lya piti nokuya moonkundathana miinima mbyoka ya pamba elongo. Oshigongi shaalongi oshali sha ningilwa pEkamuti mOndangwa.

Oshigongi shika oshali sha kalwa komukuluntu gwelongo mOshikoto Lamek Kafidi, Omupeviminista gwelongo, Anna Esther Nghipondoka oshowo aatseyinawa miinima ya pamba omauyelele nelongitho  lyiinima yopashinanena yaza koshiputudhilo shopombanda moNamibia.

Pethimbo ta popitha aalongi mesiku ndyoka Omupevi minista gwElongo Anna Nghipondoka okwali a indile aalongi yi itulemo melongo lyaanona yo ya gandje etumwalaka ewanawa noshiholelwa shoka tashi hokitha moshigwana.  “Onda hala okupandula aalongi ayehe moshikandjolongo shika molwa eitulemo lyawo sho aluhe haya longo noku pititha aanona oyendji, Oshigambo osho shimwe hashi pititha aanona oyendji onkene tsikileni noku longa aana yetu oshoka oyo aaleli yokomongula,” Nghipondoka ta ti ngaaka.

Nghipondoka ta kumike aalongi ya kale taya ulike omaihumbato omawanawa no taga hokitha opo woo aanaskola ya kutheko oshiholelwa shawo.  Ta ti naya gandje elongo lina ongushu  yo aanaskola ya ka gandje iizemo iiwanawa no tayi hokitha pehulilo. Ta indile aalongi ya kale yena ekwatathano ewanawa naavali yaanona yo ya kale aluhe haya ithana aavali ya tale iilongwa nomambo gaanona yawo ta ti shono otashi shonopeke endopo moshilongo.

Naboth Uushona ngono ali a kalelapo oshiputudhilo shopombanda (UNAM), okwali a holola kutya  osha pumbiwa opo osikola kehe yi kale yina elongitho lyo ICT , yo ya hwepopeke iilongwa yawo poosikola. Ta ti uuyuni owa huma komeho noshina omauwanawa ngoka haga pitile ngaashi moo email oshowo ya kale taya kongo uuyelele wa pamba iilongwa moo interneta. Uushona ta gwedhapo kutya shino otashi kwathele aalongi opo ya longe nuupu yo taya pupaleke iilonga yawo.

Omutaleli gwelongo moshikandjolongo shaShigambo, Nicky Natangwe Uugwanga okwali a pandula aalongi ayehe yali ya longitha ompito ndjika yokuhangana oshowo ayehe yali ya gandja omauyelele ngono aalongi yomOshigambo ya pumbwa. Okwali a holola kutya oshigongi shawo osha adha omalalakano ngoka yali ya thaneka. Okwali woo a holola eyeme lye sho ya kanitha omulongi gomoshikandjolongo she Justina Shigwedha ngono a dhipagwa nokufikilwa mohauto komusamane gwe. Ta gandja omahekeleko kaakwanezimo oshowo aalongi pamwe naye pOnalulago.

 

LEAVE A REPLY

Please enter your comment!
Please enter your name here