Iimaliwa ya Namibia no ya Angola otayi longithwa koongamba

0
179

OSHIKANGO – “Pula kutya omolwashike Namibia ihaa landa noku etamo omahooli, iiyimati oshowo iipilangi okuza koAngola? Olundji otu shishi shoka tuna okuninga opo tu monene epulo ndika eyamukulo , ihe shoka twaana osho ehalo okulonga shika mbala nopethimbo”.

Ndhika odha popiwa kuNgoloneya gwOmbaanga ya Namibia Ipumbu Shiimi pethimbo lyeshaino lyeuvathano pokati kAngola na Namibia opo iilongo mbika iyali yi kale tayi shendje nokulundululila iimaliwa yawo pOshikango noSanta Clara.Iilando mbika iyali oyili koongamba dhaAngola naNamibia.

Euvathano ndika lya kolekelwe noku tulwa miilonga oshiwike shayi otali fala mpoka kutya aakwashigwana yiilongo mbika iyali otaya vulu okushendjela iimaliwa yawo mwaambyoka yoshilongo hoka yo taya ka landa nenge taya ka landitha iinima yawo. Uuna aakwashigwana yAngola ya hala okulanda iinima yawo pOshikango, otaya shendje ashike ooKwanza dhawo poombaanga dha Namibia yo taya pewa oodola, yo aaNamibia mboka taya ka landitha iinima yawo moAngola otaya shendjele oodola dhawo dha Namibia mookwanza dha Angola noku ka landa shoka yo hala moAngola. Euvathano ndika olya lukwa oku adha onkatu ndjila onene, oshoka otali eta einyengo enene pokati kiilongo mbika iyali unene kombinga yiipindi noku koleka ekwatathano pamahupilo pokati kiilongo mbika yomUumbugantu  wAfrika.

Euvathano lyoku lundululila iimaliwa olya shainwa nokukolekwa kuNgoloneya gwOmbaanga ya Namibia Ipumbu Shiimi nambushe miilonga Ngoloneya gwOmbaanga yOpashigwana yAngola , Jose Pedro De Morais.Yalwe mboka ya li oombangi noonzapo sho euvathano ndika lya kolekwa omwa kwatelwa ooGavena yoshitopolwa sha Cunene, Antonio Didalelwa,Ngavena gwoshitopolwa sha Hangwena Usko Nghaamwa, Omuperesidende gwEhangano lyOombaanga moAngola, Amilcar Silva nOmunashipundi gwoshitayi shEhangano lyaaNangeshefa Naanafabulika mUumbangalantu waNamibia, Tomas Indjii oku tumbulapo ashike yamwe po.

Ipumbu okwa tsikile a ti Namibia na Angola oye na okulonga neitulemo nonuudhiginini opo ya hwepopeke elongo nawa lyomahupilo gawo. Shika otaye shi ningi moku koleka omakwatathano giipindi oshowo omapungulo pokati kiilongo mbika iyali.Okwa ti eshaino netulo miilonga lyeuvathano ndika oyo onkatu yomondjila oshoka otayi egulula omiyelo dhoompito dhonkalathano pamahupilo. “Otu shishi kutya otuna okuteyapo iiyimbi mbyoka ya thikama mondjila yiipindi pokati kiilongo yetu oshowo tayi imbi opo pu ye eyomumwe mokulanditha.Oshiholelwa  Angola na Namibia na ya opaleke omukalo gwiifendela opo ya shonopeke ethimbo ndyoka hashi kwata opo omunangeshefa a vule okupita poongamba okuya niipindi ye koAngola oshowo koNamibia. Omolwashike itaatu ningi uupitilo wopoongamba wa Santa Clara/Oshikango wafa ashike omweelo gumwe?” Ipumbu a pula.

“Omanga omakwatathano giilongo yetu ga kola molwa ekondjo lyetu limwe lyopapolitika, onkatu ndjika ya katukwa mpaka  oya tulapo ishewe emanya lyomukanka gwelongelokumwe epe lyopankalathano yopamahupilo,”Ipumbu a ti .

Okwa ti osha pumbiwa opo aAfrika ya teyepo iiyimbi mbyoka tayi yi moshipala  iipindi menenevi oshowo oku opaleka omaenditho nomikalo dhokufuta[omataambathano giimaliwa okuza koshilongo shimwe okuya koshikwawo] dhi yambidhidhe iipindi. Okwa popi einekelo lye kutya omimvo omulongo tadhi landula otashi vulika dhikale ethimbo  inaali monika nale kuAfrika, onkene ethimbo ongashingeyi opo iilongo yAfrika yi longele kumwe okutulapo onkalo ndjoka tayi humitha komeho noku kumika eetepo lyuuyamba  oshowo ekwatathano lyonkalathano menenevi alihe.

Ngoloneya gwaHangwena moshipopiwa she okwa ti etulomiilonga lyetaambathano lyiimaliwa yiilongo mbika iyali olya etele aakwashigwana yiilongo mbika iyali onkalo ompe, unene tuu mboka haya pitile pOshikango nopoSanta Clara.

Usko Nghaamwa okwa pandula Ombaanga ya Namibia noshowo Ombaanga yopashigwana ya Angola meitulemo lyadho moku etapo onkalo ombwaanawa  moka aanangeshefa oshowo aakwashigwana yiilongo mbika iyali taya longele mo.

“Onga Afrika, otuna okuhangana nokusindana mekondjo lyomahupilo opo tu adhe eyambapalo.Omauvathano ngaashi ndika oga pumbwa okuningwa wo moshitopolwa shoSADC oshowo miitopolwa yilwe menenevi opo tu adhe omalalakano getu geyomumwe pamahupilo pashitopolwa,” Nghaamwa a ti.

Gavena gwoshitopolwa sha Cunene, sho a popi kombinga ye okwa pandula wo iilongo mbika iyali omolwa okukoleka euvathano ndika lyopangeshefa. Nokwa indile opo ndika li kale tali longithwa piiyelo ayihe yokoongamba pokati kiilongo mbika iyali. Didalelwa okwa ti Namibia na Angola oyo aashiindathana uule wookilometa  460 noongamba ndhika odhina konyala iiyelo yuupitilo  yomwaalu gwontumba. Okwa ti aakalimo yomoshitopolwa shaCunene shoka sha palathana na Namibia kuumbugantu omuna aantu konyala yeli pomiliona yimwe pamayalulo goshigwana gomumvo 2011.

Didalelwa okwa ti ngele euvathano ndika olya longithwa piiyelo ayihe yopoongamba ndele kashishi ashike pOshikango noSanta Clara, nena shika otashi ka etela aanangeshefa oshowo aanambelewa yepangelo  uuwanawa owindji.

LEAVE A REPLY

Please enter your comment!
Please enter your name here