Kashima okuna ondjodhi onene

0
284

ONAYENA – Aluhe petameko sho okanona ta ka putuka oha ka kala ka hala oku adha sha monkalamwenyo yako noku kala taka ulike oshitalenti shako oshowo okuninga shoka kehole monkalamwenyo yako.

Toiny Kashima omukadhona goomvula 17 no kuli mondondo onti-11 mosekundeskola ya Nehale. Kashima okuna ondjodhi onene moku kutha ombinga momathigathano guukadhonadhingi moshilongo, okwa holola kutya shino okwa kala eshina manga ali omushona pethimbo ali moondondo dhopevi.

“ Onda kala handi kutha ombinga momathigathano guukadhonadhingi nolundji ohandi sindana, oyendji oya kala noku sitha ndje uunye ta  yati omathigathano guukadhonadhingi ka geshi omawanawa no kandina sho tandi monomo, nonande ya kala noku sithandje uunye inandi sholola oshoka osho oshipewa shandje no nda hala ndi shi longithe manga kuyele,”Kashima ta ti ngaaka.

Pethimbo lyuudhano mboka wali wa longekidhwa moNehale ehuliloshiwike lya piti okwali woo kwa longekidhwa ethigathano lyokakadhonadhingi, mono mwali mwa kuthwa ombinga kootaliwashele yaza koosikola dha yoolokathana. Ethigathano ndino olyali lya ningwa Olyomakaya ethimbo lyokwatoka lela.

Toiny oye ali a ulikwa ongokakadhonadhingi methigathano ndika,sho ali a dhengemo ayehe nokwa zalekwa oshishani shika. Okwali ikutha kohi nokwa mono kutya ayehe mboka yali methigathano ita ye mu vulu mokukatuka.

Okakadhonadhingi haka taka gwedhapo kutya okena ondjodhi onene moku kutha ombinga miinima nga mbika, ta holola kutya okwa hala woo oku ka kutha ombinga momathigathano goludhi nduka moshilongo oshowo pondje yoshilongo ngele a mana eilongo lye. Ta ti kashali oshipu okumona oshishani shika oshoka methigathano oyali mo oyendji no kali eshi tegelela.

Ina Mangudhi ha sikola koGabriel Taapopi naye okwali woo a sindana methigathano olyo tuu ndyoka. Mangudhi okwali a sindana onga  photogenic oshoo 1st princess. Toini Nelondo gomoNehale okwali a  sindana onga 2nd princess oshowo miss personality.

Ethigathano ndino olyali lya longekidhwa noku opalekwa ku Sandro Ithana goKashipu. Ithana okwali a gandja omagano kwaayehe ya sindana  mono mwa kwatelwa uumbindja wa shangwa KASHIPU.

LEAVE A REPLY

Please enter your comment!
Please enter your name here