Natango omukiintu gumwe a dhipagwa komulumentu gwe omukulu

0
217

OMUNTELE  –  Konima ashike yomasiku omashona oshiwike sha ziko sho kwali kwa kundanwa  omukiintu goomvula 52 ali a dhipagwa sho a yahwa nondjembo nokufikilwa mohauto komusamane gwe, natango iiningwanima yoludhi nduka oya tsikile moNooli yoshilongo.

Uusiku wokupendukila Osoondaha natango onkundana ombwinayi oyali ya kwelengendja momakutsi gaaNamibia konima sho omukiintu goomvula 30 ali a dhipagwa noku kwatwa onkonga komulumentu ngo taku tiwa okwali gwe. Otaku hokololwa kutya nakusa Martha Iyambo ngoka ali omukalimo gomomukunda Oyovu moshikandjohogololo Omuntele, okwali a kala megumbo lyahekulu.

Omupevi kommisiona mOshikoto Willem Peter okwa koleke oshiningwanima shika, ta ti nakusa okwa tsuwa oombele iikando oyindji nokwa kwatwa koonkondo nokwa ehamekwa unene momutse oshowo moombati shono ta ti osha ka hulila meso lye ngaaka. Peter ta tsikileko kutya nakufekelwa medhipago ndika omulumentu goomvula 33 a zile komukunda Elago momudhingoloko gwaNtananga nokuli momake gopolisi. Okwa tegelelwa a holoke mompangu yaNdangwa oshiwike shika.

Yinagona yanakusa Aina Amutenya okwa hokolola kutya Iyambo okwali a kala megumbo lya yinakulu momukunda ogo tuu ngoka, sho ali ta sile uunona wa yinakulu ngoka oshimpwiyu mOyovu. Ta hokolola kutya omulumentu ngoka okwali a pitile mekende konima sho a kala ta kondjitha a eegulule pomweelo nokwa nyengwa.

“Omulumentu nguka okwali eshi pondola okuya mondunda moka Iyambo ali a lala, naasho Iyambo a mono kutya omulumentu okwa pita okwali a matuka tayi mondunda moka uunona wali wa lala ashike kena sho a ningi okwemu landulilemo, aanona oyali ya matukile puushiinda uusiku owo tuu mboka noku lopota shoka ya thigi kegumbo,” Amutenya ta ti ngaaka.

Onzo yimwe ndjoka ya eta ehokololo oyali ya hokolola kutya nakusa okwali a hulithapo ekwatathano lyawo nomulumentu gwe kwali ngoka taku hokololwa ali a thiminike eye mondunda ya nakusa, naasho nakusa a tindi oku egululapo okwali a kondjitha noku egululapo. Omulumentu ngoka a dhipaga Iyambo otaku hokololwa kutya omukwashigwana gwAngola.

Molwaashoka oshiningwanima shika oshali sha ningwa uusiku opolisi oyali ya tseyithilwa nokuholoka. Oyali ya adha omudhimba gwaIyambo guli metente lyombinzi. No kwali kwa ningwa onkambadhala ku kongwe nakufekelwa ngono a ka kwatwa ashike mbala ongula yOosoondaha ndjoka.  Edhipago ndika olya fala mpoka kutya aakiintu yaali oya dhipagwa kaalumentu muule ashike woshiwike shimwe moshitiopolwa Oshikoto.

 

 

LEAVE A REPLY

Please enter your comment!
Please enter your name here