Okuna outalala natu yambidideni ava veli momhumbwe

0
321

Efimbo lopaife olo efimbo lokufu, opo ovanhu vahapu moshilongo unene tuu ounona vofikola veli monghuo ina onghambe ngeenge tashi uya koikutu yoku va etela oupyu, hano oikutu youtalala.

Natango oto hange ounona tava i kofikola veli eemhadi kombada ile vehe na eembidja. Kashi fi kutya owina, ile pamwe efuu lokuenda eemhadi kombada, ashike eedjona daKalunga dihapu kadi na apa tadi hange eembidja.

Luhapu oto mono kutya vamwe vounona ovo tava mono oixuna ngaho ovovo hava pewa oshimaliwa kepangelo, ashike ovafilishisho vavo, oshimaliwa osho ohave shilongifa po meemhumbwe davo vene unene tuu oikolwifa, oingangamwifi noikutu yavo vene ponhele yoku i longifa mounona ovo vei nuninwa.

Hano ovanailonga vokombelewa youkashike koo okanhu ovo vena oshinakuwanifa okutalela ovafilishisho ounona ava, nava tameke okulonga noudiinini ngeenge ota shi ya kokutalela po ounona ava keefikola nokomaumbo avo, opo ounona vatembulwe ko nokukufwa momake ovafilishisho ovo tave va monifa oixuna.

Kakele kaavo hava mono oshimaliwa, natango oshilongo oshina ounona novakulunhu omayovi ovo iha va mono omayambidido taadi kepangelo. Vamwe eefiye, vamwe kave fi efiye, vamwe ohava nangala momapandaanda, vamwe omo ngaho veli momaumbo omo, oshiwana oshi vashi. Epangelo letu ota li longo shili okukwafela ovo veli momhumbwe ashike osha yela ita li dulu oku va mana ko momutenya umwe. Omanga nee epangelo ta li longo nokulinanena koshikako shefelemudo, omolwa shike ove naame onga ovakwashiwana ovanelao hatu dulu okutoola okafilinga, omolwashike itatu shakeneke epangelo ondjilakati nokutameka oku kwafa ovo veli momhumbwe?

Opena omhumbwe opo oshiwana shaNamibia shi tameke okulimanga kumwe moungudu va kale tava kwafele ovo tava li tava pi ngeenge tashi uya koluhepo, unene tuu pefimbo eli lokufu.

Omadilaadilo ovaNamibia vahapu oyoo kutya epangelo olina oshinakuwanifwa okukwafa ile okufila oshisho omukwashiwana keshe, meyukililo. Ashike ohatu dimwa kutya luhapu moshilongo omu ohatu yakula mo nokumona mo omakwafo taadi koilongo ya yooloka, haadilile komahangano ehe shi opapangelo okoilongo oko.

Fye onaini hano hatu ka tota po omahangano ehefi opapangelo, taakwafele ovanhu vetu veli momhumbwe, nomonakwiiwa a kakwafele koilongo yokondje? Eshi epangelo letu la kafa po vamwe nena, eeteelelo oleli kutya tu dule okuyambidida vamwe.

Vahapu otu na ashike omakumbafa noikutu tai olele meekofa, ponhele yoku iyandja po kwaavo veli momhumbwe fye tu ninge eyooloko meenghalamwenyo dovanamwenyo vakwetu.

Oinima oyo ili meekofa naidje mo, okuna vahapu veli momhumbwe novei pumbwa. Ekumbafa olo ove uwete la tutuka no itali monika vali nawa momesho oye, ota li dulu oku eta ehafo koshipala shomunhu mukweni nokumukwafa opo a kofe nombili.

Ombidja oyo ino hala vali idjalwe kookaana koye shaashi paife itaka wana mo vali ota i dulu oku eta omadilaadilo a ngungumana kokaana ka kwao koo ka dule oku li tula mo mofikola ka pite ke uye ka tunge Namibia.

Okafilinga oko nande uwete kutya owe ka nunina ekaya, obiila ile owisky, ota ka dulu okulandela okaana okaNamibia onghaku nokuka kwafa kaye kofikola memanguluko, koo ka ninge ondohotola, omuhongifikola, ile omuindjinia oo te uya a kwafe oshiwana nomapupi ta e uya.

Hano natu li longeni oku kamutuluka, tupe ovo veli momhumbwe fye tu ha efe le po epangelo letu. Natu li pandule ni, noku li shakeneka ondjilakati.

LEAVE A REPLY

Please enter your comment!
Please enter your name here