Oshiwana itashi yandje elongelokumwe

0
227

EENHANA – Ovanailonga moshikondo shounamapya noimuna, omeva nomaluxwa nosho yo ovapolifi, otava tanguna kutya ovakwashiwana vamwe in ava hala oku longela kumwe novanambelewa mekondjifo lomukifi wekondo nelaka oo tau tyakaleke konooli yoshilongo.

Ovakwashiwana vamwe vati ina ava hala oku dja mo meehauto opo va ka lyate poumbadwa vatulwa peenhele opo pa tulwa omainda opo va dipae ombakiteli yomukifi oo, vati tava ti kutya oshinima osho tashi ningwa kepangelo osha fa sha nyika oundudu noulodi.

Molwa okuhalongela kumwe peenhele opo oshiwana tashi hadwa meendjila, omunambelewa omupopili ko wopolifi moshitukulwa shaHangwena Sisante Kaume Itumba, ota kumaida ovalongifi voitauwa moitukulwa youlifilo waaveshe mwa ningwa omakondeka ve li ufe keeveta nomalombwelo a tulwa po.

Sisante Itumba ta ti, okudja muMai opolifi pamwe novanambelewa voshikondo shoundjolowele woimuna, oya  pandula eshi oshiwana sha uda ko okuha umbata ombelela yoimuna noyoinamwenyo yomakondo a pandjuka, oshoyo omaadi nomashini. Ashike, opolifi oya didilika ovashingi vomatuwa  vamwe novatwaalelwa vamwe po itave li ufa komalombwelo ngaashi okupatulula etuwa lomunhu  mwene ngaashi ta lombwelwa,  vamwe tava anye okulondoloka  ve na eudeko la puka okulyata pokambadwa ve wete sha puka, ndele pokakumbafa opa tulwa omuti opo vaha twaalele omukifi oko va uka.

Sisante Iitumba ota ti, vahapu oveli tokifa voovene kokuhaudafana, vamwe va umba opolifi novanambelewa omalalka mai mwaashi. Opolifi otai kumaida oshiwana kutya, opo omukifi uha tandavele oko inau fika, omakondeka oku na okutwikila komesho natango oule weemwedi hamano okudja muMai. Moshitukulwa shaHangwena omwa dikwa omakondeka pOmungwelume, Onhuno, Oushake,nOpoupili. Sisante Iitumba ta ti, ehado kovalongifi veendjila nande ve wete tali va tokifa, oo auke omukalo tau dulu ku ya omukifi moshipala.

Omunambelewa wondodo yopombada koshitukulwa shoundjolowele woimuna koshikondo shounamapya, omeva nefiloshisho loushitwe woixwa John Shoopala,  okwa tumbula kutya epangelo otali longifa eemiliyuna 119 okutunhila eengobe di fike pomiliyuna 1.2 daama koitukulwa youlifilo waaveshe oko kuna ovakalimo ve lile po 70% dovaNamibia hava xupu moilikolwa yomomapya.

Konima yefimbo la koya pomwedi ovalongifi voitauwa ova kala nokuhadwa pomakondeka pena ovanambelewa vopolifi novanambelewa vouhaku woimuna.

Omukifi wekondo nelaka owa tukuka tete moshikandjohoololo shaKongo moshitukulwa shaHangwena muMai 2015, momikunda Okalupalona, kOnehanga nopomhanga pOndamayomunghete konima yomafiku manini, omukifi owa monika vali koikandjohoololo Okankolo, Onyaanya, Eengodi, Onayena nOniipa moshitukulwa shaShikoto, eshi osha kuma omaxupilo oshilongo. MuJuni, omukifi owa lopotwa vali wa monika moimuna yomoshitukulwa shokoKavango uninginino.

 

LEAVE A REPLY

Please enter your comment!
Please enter your name here