Uudhano womuthigululwakalo pIihenda

0
184

OSHITAYI – Aalongi posikola Iihenda mOshitayi oyali ya longekidha uudhano womithigululwakalo mono oongundu dhuudhano posikola mpoka dhali dha kutha ombinga nokuthigathanapo.

Shino osha ningilwa posikola opo tuu mpoka metitano lya zi ko. Aalongi, aanaskola oshowo iilyo yelelonongelo naamboka yopopepi oyali ya gongala noku ondodha omeho puudhano mbuka wopamuthigululwakalo.

Omukwateli komeho gomaudhano posikola pIihenda, Josua Toivo okwali eshi yelitha kutya oya longekidha uudhano mbuka womithigululwakalo onomenawina ongomalolelo yo ya tale nkene aanaskola taye shi enditha momithigululwakalo, ta ti shino oshikando shotango sho yu unganeke omithigululwakalo poskola yawo.

“Otwali twa mono kutya moosikola odhindji omithigululwakalo odhilipo tadhi dhimbiwa oshowo oohedhi nomikalo maanaskola odha kanamo, yo kaye nawe esimaneko lyookuku yonale onkee twa tokola tu unganeke uudhano womithigululwakalo tse tu tale aanona yetu nkene taye shi pondola,” Toivo ta ti ngaaka.

Toivo ta ti gamwe gomomalalakano gawo opo ya unganeke uudhano mbuno okulonga aanaskola dhimwe dhomomithigululwakalo dhomihoko dha yooloka moshilongo, okutseya wo esimano lyomithigululwakalo nokudhi kalekapo ngaashi dha thigwapo kaakulu yonale. Yo aanaskola yedhi kalekepo ngaashi yedhi adhapo.

Ta ti nonande omithigululwakalo pIihenda dhali owala omalolelo okwe shi holola nomukumo kutya oye shi pondola nodhali dhe ende nawa, oshoka oondondo dha yoolokathana odhali dha kutha ombinga noku ulika nkene omithigululwakalo dha pumbwa oku simanekwa oshowo nkene aantu haya dhana iidhano yopamuthigululwakalo.

Ta uvaneke kutya oya thaaneka omumvo ta gu ya ya ka longekidhe uudhano uukwawo mbono tawu kakala wa kola shi vulithe mbuka wonuumvo. Ta gwedhapo kutya oyena elalakano opo omumvo ta guya ya ka kale niipopiwa kombinga yomithigululwakalo yo taya ithana wo oosikola dhopuushiinda nopomudhingoloko nadho dhiye dhi kuthe ombinga noku paathana omayele nuunongo mokudhana iidhano mbyoka yopamuthigululwakalo.

Oyendji mboka yali yeya ya ondodhe omeho oyali ya nyanyukwa noonkondo moku tala nkene oshigwana shokomongula tashi imbi nokudhana iidhano yopamuthigululwakalo , nonkene ta yatsu omukumo aanaskola aakwawo ya simaneke oohedhi dhoshilongo yo yedhi kalekepo ngaashi dhili.

 

LEAVE A REPLY

Please enter your comment!
Please enter your name here