Kambala okwa ti inasitamena poobar, ye ina tuka aantu muukolwe

0
376

ONGWEDIVA – Opolisi oya li ya kwata kansela gwoshikandjohogololo Onyaanya uule woominute dhimwe dhimwe Olyomakaya  gaziko. Kansela Petrus Kambala okwa kalekwa miikaha yomiya dhashinana uule wominute ndhoka sha landula komalundilo a ningilwa kutya anuwa okwa li a talalekele moombaa dhomalovu molukanda Okathiya moshitopolwa shaShikoto.

Kambala okwa ekelehi omalundilo ngoka a ti ye namukwawo gumwe oya li ya ka talalekela kooha dhopate ndele ye ina thikama nokutalalekela piiyelo yoondunda  dhaantu ngaashi yamwe ya hokolola noku mu lundila anuwa.

Ehokololo olya ti omunamimvo 41 Kambala anuwa okwa li iidhengamo shapitilila ongulohi ndjoka naashika osho sha fala ngiika mpoka a lundilwe kutya okwa kala talalekela posheelo shombaa yimwe omanga inee keshi endulula ishewe pombaa onkwawo ongulohi oyo tuu ndjoka. Okwa lundilwa woo kutya anuwa okwa li ta tuku aalandi pombaa ndjoka noku ya dhimbulutha kutya ye oye omunani gwoSwapo moshikandjohogololo shoka.

Omupevi Kommissina gwopolisi mOshikoto, Naomi Katjiua okwa koleke kutya mwene gwombaa posheelo shaandjoka pwa li anuwa pwa sitamenwa ku Kambala okwa fala enyenyeto kopolisi ya Katope Olyomakaya ga yi. “Enyenyeto olya shangithwa popolisi  Olyomakaya , nomanga omunyenyeti te shi ningi Kansela Kambala naye okwa thikipo,” Kommissina gwopevi gwopolisi a hokolola.

Ihe Kommissina gwopevi okwa ekelehi omalundilo kutya Kansela ngoka okwa li a kwatwa kopolisi uusiku auhe wesiku ndyoka. “Ye ka li a kwatwa, okwa li ashike a kuthwapo noku falwa kongulu yoradio yopolisi opo kaa kale tiidhopo mehokololo lyomunyenyeti,” osho Kommissina gwopevi Katjiua a tsikile okuhokolola. Katjiua okwa ti Kambala okwa li a falwa mbala kegumbo sho embamba lyopolisi lye ya posasiona yopolisi okuza palwe momudhingoloko.

Kambala okwiipatana omalundilo ngoka sho a pulwa a gandje okoomenda ye ku Kundana, a ti ye kali a kala ta sitamene shaampoka nenge ye ina sitamena pombaa yomuntu nando ogumwe. “Otwa li yaali mboka twa li twa ka talalekela konyala oshinano shoometa 50  okuza kopate yoteya oshoka omuntu ito vulu okutalalekela ashike shaampoka, ndele ngame inandi talalekela pombaa yomuntu nando ogumwe ngaashi yo taya lundile,” Kambala a ti mboka ya kwatela shika komeho oye na elalakano okunyateka edhina nondhilo ye. “Mboka otaya popi iifundja elela, iifundja iitokele ngaashi ya lukwedhina komukulu gwonale.Mbyoka iifundja yoyene ya totwa kwaamboka inaa ya panda sho ndapewa oshinakugwanithwa shuukansela waNyaanya,”Kambala osho a ti.

Oonzo odha ti kansela ngoka opo a pewa uukansela waNyaanya okwa ende okuya kosasiona yopolisi ndjoka yili ashike okanano okashona okuza puundingosho mboka.

Kambala okwa landula Henock Kankoshi ngoka a ulikwa Ngoloneya gwOshikoto.

Sho a ekelehi omalundilo ngoka Kambala okwa lombwele Kundana kutya ye okuna omuhingili molwashoka ye iha hingi oshihauto. Oshiningwanima shika osha fala momanyenyeto komakwatathano gopaintaneta, mokati kaangoka muna gaantu yamwe ya thaneke kutya Kambala ina hogololwa momahogololo gookansela ngoka taga kalako muNovomba nuumvo.

Okwa lombwele Kundana kutya okuuva omitoto ndhoka tadhi popiwa momakwatathano gopainternet. “Onda lundilwa anuwa handi hingi oshihauto shoshikandjohogololo  omanga ndaana ombapila yokuhinga, oshowo kutya ngame anuwa onda talalekele poombaa dhaantu oshowo onda lalele posasiona yopolisi uusiku mboka. Ayihe mbyoka iifundja iitokele to,” Kambala a ti.

Okwa lombwele Kundana kutya ye okwa kala uusiku wOlyomakaya pegumbo lyaandjawo ndele kali kosasiona yopolisi ngaashi tashi popiwa.

Kambala okwa kwashilipaleke aahogololi ye kutya inaya kanitha omukumo muye mokulandula omahokololo gaamboka ta ye ya tsitsimike opo yo yaa mu hogololole pomahogololo gookansela ngoka geli muNovomba nuumvo.

“Ngame ondi li ashike ngaashi mu shindje ngame inandi lunduluka okuza tuu sho mwa hogolola ndje okuwilika Onyaanya onkene inamu kanitha einekelo mungame.Otandi tsikile okuyakula aantu yandje molwomatompelo ngoka yo ya hogolola ndje okuya wilika,” osho Kambala a popi.

LEAVE A REPLY

Please enter your comment!
Please enter your name here