Mwene gwomukunda Oshikwiyu a tidhwa melelo lyaNdonga  

0
282

OSHIKWIYU –  Mwene gwomukunda Oshikwiyu mOndonga Tatekulu Teofelus Iikwa okwa tseyithilwa a ethe iilonga ayihe  yi na sha nElelo lyaNdonga omwedhi gwayi.

Ikwa okwali a lalekwa nokwa tseyithilwa a ethe iilonga yomehale lyuuwa oshowo yomukunda Oshikwiyu, ye a thigepo iilonga ayihe ya pamba Elelo lyopamuthigululwakalo. Momushangwa ngoka gwa shangwa nokushainwa kOmukwaniilwa Immanuel Kauluma Elifas momwedhi gwaziko ogwa lombwele Iikwa a hulithepo iilonga mbyoka , ye a kale ta longo iilonga ye mwene.

Mombaapila woo ndjoka omwali mwa hololwa gamwe gomomatompelo ngono ge etitha opo Iikwa a pewe elombwelo a hulithepo iilonga. Oyali ya holola kutya okwa konekiwa a kala ta ningile aakwashigwana omambandameko noku lundila Omukwaniilwa, nonande Omukwaniilwa oha indile noku kumika aawiliki ya yakule aashitwa ya Kalunga nombili nopwaana omatilitho

Okwa kala woo anuwa ta longo nuulingilingi sho ta futitha aantu shaali pamulandu nopaveta, oshigwana osha ka tameka oku nyenyeta tashi pula iinima yasho kOmukwaniilwa mono ye naye a nyengwa okugandja eyamukulo lya yela kutya omolwashike Ikwa ta longo nuulingilingi. Okwa dhini woo elombwelo lyuuwa, sho konima a lopotwa  mwaayihe mbika ashike anuwa ina holoka kuuwa nonande a kala ta ithanwa a holoke koshipala shOmukwaaniilwa.

Omukwaniilwa okwa pandula Ikwa sho a kala shimwe  shomiilyo yElelo lyaNdonga , ashike okwa holola eyeme lye no kutya Iikwa okwa longa iilonga tayi kenyeneke  nonande ali iinekelwa kOmukwaniilwa a yakule oshigwana. Ta ti iilonga mbyoka ye a longo otayi shekitha elelo lyaNdonga nOmbala yaNamungundo.

Mwene gwoshipundi shaLukonda Tatekulu, Petrus Awene naye okwali a koleke oshinima shika, ta ti Omukwaniilwa oye mwene a gandja ombaapila ndjoka ku Iikwa a hulithepo iilonga yomukunda no yo mehale lyuuwa.  Ta holola kutya uuna aanumukunda Oshikwiyu taya pumbwa omayakulo okwi ilongekidha oku ya yakula manga tapu monika mwene gomukunda ngoka ta pingenepo Ikwa.

Elelo lyopamuthigululwakalo lyoshilongo shaNdonga olyali lya laleke Iikwa pehulilo lyomvula yaziko (2014), a kale pevi manga oshipotha she tashi talululwa komukwaniilwa, noku ningilwa omatokolo kompangu yopamuthigululwakalo. Okwa li a tulwa pevi manga konima sho ali a lopotwa a gandja epunda kokanona kosikola nonande eli omuleli goshigwana. Iikwa ngono a kala ta lele omukunda Oshikwiyu nokwa kala omukwatheli mehale lyuuwa mOmbala okwa kala noku ithanwa kompangu ashike okwa kala itaa holoka nonande a kala ha monika mpaka naampeyaka.

LEAVE A REPLY

Please enter your comment!
Please enter your name here