Nakufya Fred Savage ota pakwa poUsakos Olomakaya

0
287

WINDHOEK –Okamatyona keedula 13 oko ka ponokelelwe noku dipawa keembwa doukongo exuliloshivike ladjako ota ka pakwa poUsakos Olomakaya ei.

Exuliloshivike ladjako ovakwaSavage molukanda laTjomuise ova hangika koudjuu, eshi Fred Savage okamatyonakeedula 13 ka ponokelwa noku pombaulwa keembwa doukongo odo da puma okudja moluumbo lambulado. Nakufya Savage okwa li tava ende navakwao pefimbo a  ponokelwa keembwa odo. Omunambelewa omukulunhu wopolifi yoshilando shaWindhoe, Abraham Kanime okwa koleka kutya oumatyona mokupita mepandaanda laStockolm monhulilwa yaOtjomuise pamwe noumatyona vakwao  vavali oushiinda,  ova ponokelwa keembwa da fa oilikama. Savage okwa kwatwa keembwa noku mu pombaulila moshitauwa tadi tameke okumu lya po.

Omunambelewa wopolifi Kanime ta ti, efano lii loo lihalula ola nyemateka oshiwana eshi sha endelela okuuya po sha hanga okaana ka fya nale. Kanime okwa ti oveta meni lomalelo aeshe oya ufa keshe ou e na ombwa meni leengaba daMuni, oku na okukala ena ombapila yombwa yaye kodula keshe oshoyo ombwa oi na okukala ya tunhilwa.  Omunhu keshe e na eembwa okwa teelelwa  e di tule moluumbo, di kale kokanyongo. Neembwa doukongo inadi ufwa okukala dihe li kokanyongo, mwene ngeenge ta piti mo nayo oku na ku i manga komulungu. Mehokololo laye okwa tumbula kutya mwene weembwa ka li po mexuliloshivike notashi dulika eembwaa edi da fa koshi yodalate di ka konge oikulya. Tashi dulika sha etifa naava va li tava kendabala va shinge po eembwa edi di hale kuva nukila, onghee ove di dipaa.

Omunambelewa omupopiliko wopolifi peembonge dakula moVenduka, Edwin Kanguatjivi okwa ti opolifi yaNamibia otai konaakona oshiningwanima sheembwa doukongo da pombaula po okamatyona aka. Kanguatjivi ta ti, opolifi otai ongele oumbangi wa pumbiwa opo yuutwale kombelewa yomutokolindjai.

Pokati opo oshikundaneki Kundana osha kundana vali kutya, omukwanedimo waSavage, okwa holola nghee mwene weembwa a kwatafana novakwanedimo nokwa udaneka okuyandja aishe tai longifwa  pepako eli tali ningwa Olomakaya ei koUsakos moshitukulwa Erongo.

Ovakwatelikomesho mepangelo oshoyo mongeleka ova talelapo aakwa Savage oshivike eshi okuva hekeleka nokuva kumika osho yoo okuva kwafa palutu. Mokati kavo omuna Ominista yEhongo, Katrina Hanse Himarwa,Govena waKhomas, Laura McLeod Katjirua, Meme Monica Geingos Omukulukadi wotete, Kansela wa Khomasdal North, Margreth Mensah-Williams.

Nakufya Savage okwa hokololwa kovahongi vaye kutya omunafikola muwa he li hongo nawa, ye okuhole oku liyamba noku kwafa keshe apa ekwafo lae tali pumbiwa. Ovakulunhu vaye ovo vali ve mu idilila meumbo lavo penongelo lili pondje yaVenduka ova ti omumatyona ou oha dulu okulonga oilonga keshe oo a pewa no itaa ngongota.

LEAVE A REPLY

Please enter your comment!
Please enter your name here