Omumbiisofi Nambala a yapula ongeleka ompe yegongalo Oshitayi

0
499

OSHITAYI – Osoondaha ya ziko oya li esiku lyopandjokonona megongalo nomomukunda Oshitayi oshowo mOngerki OnkwaEvangeli paLuther moNamibia (ELCIN). Ondjokonona oya ningwa sho egongalo ndika lya yapulilwa etungo epe lyongeleka.

Eyapulo olya tetekelwa kelongeloKalunga ndyoka lya kalwa kaayenda naakwanegongalo omathele mboka ya li yuuvu omambo Osoondaha ndjoka.

Egongalo  lyaShitayi olya totwapo momumvo1890 mewiliko lyomutumwa  Omusoomi, August Petenen ngono a zile kOmandongo, pethimbo mpoka ongeleka oyo tuu ndjika oyali hayi ningilwa mondoolopa yaNdangwa yali hayi ithanwa Oshitayi shaNdangwa, nokonima oyali ya tembukamo mOndangwa nokuya komukunda Oshitayi noya kala hayi ningilwa popepi noomwandi dhaNamuthima.

Eegongalo Oshitayi otaku tengenekwa lina iilyo yegongalo tayi ihilile paakwanegongalo omayovi omilongo mbali nenge yevulepo.  Egongalo ndika olya ningi oonkambadhala omimvo ndhoka dha pitipo opo li kale lya tunga etungo lyongeleka epe, lyopashinanena oshowo enene nawa tali vulu oku gwaana aakwanegongalo ayehe ngele oya holoka komambo. Etungo lyongeleka ompe yopashinanena olya tamekele okutungwa momumvo 2000, pethimbo egongalo ndika lyali mewiliko lyomusitagongalo Simon Itula.

Etungo lyongeleka yegongalo Oshitayi olili ookilometa oonshona okuza kopate no lili popepi noskola yaShitayi oshowo ndjoka yIihenda. Yamwe yomaasita mboka ya yakula megongalo ndika ongaashi Eino Johannes Itope, Fillipus Imene,Leonard Shongolo,Titus Ngula, Simon Itula, Hosea Namupala nongashingeyi egongalo otali wilikwa kOmusita Lameck Nambahu, ngono ali a langekwa mulyo momumvo 2012.

Omumbisofi omukuluntu mongerki yaELCIN Omundohotola Shekutamba Vaino yaVaino Nambala okwali a egulula pambelewa oshowo a yapula etungo lyongerka yaShitayi. Omumbiisofi Nambala okwali a ende pamwe naasita yaza komagongalo ga yoolokathana oshowo aasita yaza kombelewa yongerka.

Pethimbo Omumbisofi ta yapula noku egulula ongerka ndjika okwali a pandula aakwanegongalo lyaShitayi sho yi itulamo metungo lyongerki noye shi pondola okuthikamithapo egumbo lyOmuwa nonande pwa kala puna omashongo nomandangalati taga kandeke iilonga yiye komeho. Okwa indile aakwanegongalo ya pangelwe kombili  yo ya kale aluhe yena etiloKalunga.

ElongeloKalunga ndyoka lyali lya tamekwa neyapulo noku kwatelwa komeho kOmumbisofi, Nambala olya  ningwa wo mekwathelo lyOmusita omugundjuka gwokegongalo Elombe Selma Sheya opamwe nOmusita Jesaya Iipito. ElongeloKalunga olyali lya mwenyekwa koongundu dhomalwiimbo ngaashi Ondangwa youth choir, Natse oyOmuwa,Ekandanga Gandj’ompito oshowo Omuwa tu wilika.

Omusita ta wilike egongalo Oshitayi Lameck Nambahu okwa ti etungo lyongeleka ndjika olya pula oshimaliwa oshindji, ta ti ongundu yaakwanegongalo ya hangana moku kandulapo oompumbwe dhegongalo yOshitayi Development Trust Fund odha dhana unene onkandangala metungo lyongeleka oyo tuu ndjika , nokwa pandula ayehe molweyambidhidho lyawo nokuthikamithapo ongulu yOmuwa. Oshitayi Development Trust Fund oshali woo sha gandja omagano kegongalo esiku ndyoka mono mwa kwatelwa iipundi niitaafula yopashinanena mbyono tayi kala tayi longithwa moshinyanga shegongalo, ocompiuta neshina lyoku indjipaleka oombapila noshowo omagano galwe.

 

LEAVE A REPLY

Please enter your comment!
Please enter your name here