Omuneyana gwomabanana ta ga fuula aashiinda

0
194

OMAHENENE – Omulumentu gwepipi lyopokati okwa tindi okuninga gumwe gwomwaamboka taya si ondjala nokwa tokola opo a totepo oshikunino shiiyimati opo a paluthe aanegumbo lye.

Wellem Johannes Ekandjo omunamimvi 40 okwa ti ye okwa putuka kee hole ondjala na okwa tokola opo a tameke okwiilongela kuye mwene opo a hupithe oyana nomukadhi.

Ekandjo okwa valelwa momukunda gwedhina Ondukuta moshitopolwa shUukwaluudhi na ngashingeyi okuna egumbo lye momukunda Omahenene moka eli ngashingeyi ta longo nuudhiginini nokufuula oyendji mboka ya hala ye mu holele.

Omulumentu nguka okuna oshikunino oshinene moka ha longo mo, omambanana, omapungu, omakwaava, omamango, oomweenge dhosuuka , omakunde , omakapa noshowo omatama.

Kakele nee kiiyimati mbyoka yazi nokutumbulwa pombanda omulumentu nguka okuna woo odama dhili ntano dhina oohi ndhoka ta tekula.

Ekandjo okwa tokola nokuli opo a hulithepo oku lima iilya oshoka aniwa otayi pula ethimbo opo a wape oku longa iihape.

“ Ngame mwene onda dhilaadhila nokuli okuninga epya lyandje oshikunino opo ndi vule okupa aashiinda shandje ompito ye ye okulonga nangaye oshoka oyendji otaya uhala ya thikamena ndje ya hala okulonga nangame,” Ekandjo ati.

Ashike uupyakadhi mboka wa taalelwa ku Ekandjo owo mboka kutya aniwa kena omashina ga gwana oku kala a longa ehala enene lyuunene woohectara 11.

Okwa ti ngashingeyi okuna nale aagundjuka yeli omugoyi mboka haye mu thikamene uule konyala kehe esiku opo ya longe naye ashike ita vulu oku longa nayo oshoka kena omashina unene gokupomba omeya noshowo gokupulula mepya.

Iilonga mbyoka ngashingeyi Ekandjo ohe yi longo koonyala ihe ina hala okulongitha mboka yena ehalo okumona uunongo koonyala.

Ekandjo oshikunino she noshowo oodama dhe dhoohi odha kwathela aanamukunda oshoka oheya landitha iinima kwaashoka yena po ngaashi iilya opo ya vule oku ninga uungeshefa wawo uushona noshowo okulya momagumbo.

Omanga mboka yena iimaliwa oheya landitha kondando yili pamuthika gwiipindi yoludhi ndoka.

“Oshikunino shika oshihokithi na otashi kwathele lela aanamukunda oyendji unene mboka kaa ye na osheelelwa ihe kayena oshimaliwa. Oshoka omuntu oha kutha ashike uulya we mboka ena ngame tandi mupe oohi dhe dho kweelela,” Ekandjo a lombwele Kundana.

Ashike omulumentu nguka okwa li a indile ngele opena omunamutimahenda ta vulu okumu kwathela nomashina gokupomba omeya nena otashi kala oshiwanawa oshoka otashi kwathele aakwashigwana oyendji.

Ka kele koshikunino Ekandjo okushi woo okutunga, oshoka  megumbo lye omuna omatungo ga kola ga tungwa momukalo gwa pumba momikunda.

Omatungo ge ogatungwa a ashike nokaungulita kamuna oondhopi ye pokati ta tula po iiteenda mbyoka ya longa nale he keyi tala ketoto lyiiyagaya.

Okwa kumagidha aanamibia mboka kayena iilonga ya kambadhele oku longa kehe shimwe opo ya kale omitumba pomagumbo.

“ Ngashi etungo ndika onde li mu ulukila nelalakano okulonga aaNamibia kutya omuntu oto vulu oku longa oshinima shoye shongushu ihe inashi ku pula nando ondilo,” a ti ngaaka.

LEAVE A REPLY

Please enter your comment!
Please enter your name here