Oongundu dhuudhano dha thigathanapo mOnyaanya

0
210

ONYAANYA – Oshikondo shomithigululwakalo mUuministeli wElongo nonuumvo osha longekidha ethigathano lyoongundu dhomaudhano gopamuthigululwakalo, mono oongundu dhoonkatu dha yoolokathana hadhi kutha ombinga noku thigathanapo opo ku monike ndjoka hayi dhana yi vule adhihe.

Omunambelewa mombelewa yomithigululwakalo mOshikoto Aina-Paulina Muulila okwa holola kutya uudhano mbuka womithigululwakalo oha ye wu longekidha owina omvula kehe, dho oongundu tadhi ulike iilikolomwa yadho yopamuthigululwakalo noku dhana woo iidhano niiyimbo yopankuluhedhi.

“Ohatu gandja elombwelo kombelewa yaKansela mOshikandjohogololo kehe shili moshitopolwa shaShikoto opo ngele omuna oongundu dhina ohokwe yokukutha ombinga muudhano womithigululwakalo dhi kale dha gandja omadhina gadho, dho dhi kuthombinga, noku ulika uunyakwa wadho momithigululwakalo,” Muulila ta ti ngaaka.

Muulila okwa holola kutya  konyala iikandjohogololo ayihe mOshikoto oya gandja oongundu dhopamuthigululwakalo nuudhano mbuno owali wa tameke petameko lyaJuni. Ta gwedhapo kutya pethimbo ndino iikandjohogololo ngaashi Onayena, Okankolo, Eengodi nOnyaanya oya ninga nale omathigathano ngaka nokwa tegelelwa iikandjohogololo ayihe yi kale ya longekidha omaudhano ngaka.

MOnyaanya oongundu odhali dha thigathanapo ehuliloshiwike lyaziko.Pondondo yoongundu dhopevi ongundu ya Aune Amalovu ya yambukile kEthikilo oyo yali ya sindanapo ekopi, tayi landulwa ku Kamanya kanene omanga Pemba Mukweni a thiki puutitatu (3). Pandondo yopokati,Kooloho kAshigwana oye a sindanapo ekopi, yo ongundu yEfululu lyAangwali ta yi ya puutiyali.

Onkatu yo Junior oyali ya sindanwapo kongundu ndjoka ye ya yotango sho ya dhana nawa noku dhengamo oongundu adhihe ongundu ndjika oyo Gwamulungu ya yambukile mosekundeskola ya Uukule omanga Shimana eya puutiyali.

Oongundu dhaakuluntu ndhoka dhali dha kutha ombinga ongaashi Mekololo lyOonime oshowo Happy Nakaambo. Omwa li woo mwa kuthwa ombinga kaakulupe mboka yena oomvula okuza po 60, mbono haya imbi noku dhana iidhano mbika yopamuthigululwakalo no ha ya  ithanwa oonakulwa aakulu muudhano mbuka.

Muulila okwa ti oya thaneka ethigathano lyopashitopolwa li ka kaleko momasiku 13-16 Aguste nuumvo, tashi ka ningilwa posekondele pOnguti mOkankolo. Ta tsikileko ta ti oongundu adhihe ndhoka dha sindana kiikandjihogololo otadhi ka thigathanapo pashitopolwa, noku ulika iilikolomwa yadho yopamuthigululwakalo. Ta indile aantu ya simaneke noku kalekapo omithigululwakalo dhinomwenyo nongushu.

LEAVE A REPLY

Please enter your comment!
Please enter your name here