Oshoongalele shoACC sha ninga omatokolo mape

0
234

WINDHOEK – Oshoongalele shoKommissi yEkandeko Loulingilingi ,oshimwe shomoyoongalele ya pumba moNamibia  osho sha ninga omatokolo ongushu. Ouyelele owa yandjwa kOmunambelewa omuwiliki woKommissi yOkukandeka Uulingilingi Paulus Noa, konima yoshoongalele sha li mohotela yoSafari moWindhoek.

Noa okwa lombwela  Kundana kutya, oshoongalele osha eta po omushangwahokololo tau kwafele epangelo li totepo omilandu tadi imbi oulingilingi moshilongo,opo eliko loshilongo li yambuke po noluhepo li shune poshi. Okwa weda po vali kutya, ovakufimbinga moshoongalele, ova didilika eeveta dihapu dikulu tadi longifwa moshilongo da etifa po eemhito opo vahapu va mone eembululu dokulonga oulingilingi. Ota ti, oshoongalele osha mona kutya eeveta dimwe oda kulupa unene, dimwe inadi pewa eenghono kepangelo di kelele omakengelelo, onghee omushangwa oo wa dja moshoongalele otau shangululwa nawa kombelewa yoKommissi opo uyandjwe koKabinete ka ninge etokolo laxuuninwa eeveta di landulwe moikondo ya yooloka.

Noa ta fatulula kutya, eteelelo letokolo loibofa efimbo lile ohali shololifa oshiwana, onghee eemangu otadi eta po elunduluko letotife po leemangu dokupangula oibofa youlingilngi moWindhoek. Okommissi oi na okulandula omilandu dopaveta, nomafiku epangulo ohaa udafanwa kovakalelipo paveta opo oibofa iha undwilwe komafiku komesho. Kombinga yoshiwana shi wete ovaNamadina ihava konaakonwa koKommissi ngee va nyona, oibofa aishe ya lopotwa ohai konaakonwa noidjemo ohai yandjwa konima yekonaakono oku i na okuyandjwa. Ta indile oshiwana shi kale nokulopota oukengeleledi nokuyandja oumbangi  wa yela pefimbo koKommissi opo eliko loshiwana liha liwe kuvamwe manga vamwe tava fi oluhepo. Oshiwana ngee osha mono oibofa ya lopotwa ita yeendelelwa po okukonakonwa  kopolifi,  otashi dulu yoo okulopota kombelewa yOmbudsman keshe.

Namibia okwa tulwa pomufika woilongo yeliko li li nawa, noshidjemo osha ulika kutya moshilongo, mu na ovanhu eemiliyuna2,2 ovanhu ashike ve lile po eepelesenda 5 va hepuluka fimbo ovanhu veepelesenda 95 otava mwenya noudjuu. Oshoongale eshi shaliko pexulilo lomwedi wadjako osha li sha kalwa kovanambelewa vadja komahangano a yooloka moshilongo nokoilongo yopondje ngaashi koSouth Africa, Zambia, Tanzania naNdowishi.

LEAVE A REPLY

Please enter your comment!
Please enter your name here