“Otandi ka ninga sha mondjokonona” Ambunda osho itaala

1
250

WINDHOEK – Enyakwa lyaNamibia nale mokudhenga oongonyo Paulus ‘The Rock’  Ambunda okuuvite a simanekwa sho a pewa ompito opo a kondjele epapa lyuunyakwa muuyuni teshi ningile moshilongo shaandjawo.Ambunda ngele ayihe oya ende ngaashi sha thanekwa ota ka kondja nomukondjithi gwe okumona epaya lyuunyakwa epe.

“Oompito ngaashi ndhika odho ndhoka omudhengingonyo kehe ha kala taya yaguma nokudhiladhila, onkene ngame ondinelago noshowo onda yambekwa okumona ompito ndjika. Onkene ondina etegameno okuuvitha Namibia uugumbo esiku ndyoka tandi ka katukila moringa noku kondjitha omudhengingonyo ngoka oye enyakwa ngashingeyi” Ambunda osho uuvaneke.

Omudheuli gwa Ambunda Nestor Tobias, okwa tanga omudheulwa gwe oshowo uudhano woongonyo moNamibia.

“Ambunda omudhani a tseyika nawa muuyuni onkene ompito ndjika okwe yi ilongela. Ye enyakwa nale lyuuyuni mokudhenga oongonyo, oshowo ye okuli enyakwa lyopaigwana mehangano lyokudhenga oongonyo lyo WBA  oku li wo pomuthika omwaanawa ngele tashiya mokuyalulwa pondondo mpoka eli momusholondondo gwaadhengingonyo omanyakwa muuyuni. Okwa tulwa pombanda komahangano geli gane ngoka haga wilike uudhano woongonyo muuyuni oku li ponomola ontintatu payalulo lyehangano lyo WBO, okuli pehala lyotango payalulo lyo IBF, pehala eti-14 payalulo lyehangano lyo WBA oshowo pehala eti-17 payalulo lyehangano lyoongonyo lyo IBO. Okukala wa yalulwa komahangano gane gokuwilika uudhano woongonyo muuyuni olyo esimaneko enene naashika osha ningi Ambunda a kale omukalelipo  gwoshili gwa Namibia momaudhano’ osho Tobias uulike.

Tobias okwa ti eshongo enene ndyoka omudhengingonyo ha tsakaneke oondyoka lyoku mona ompito oku kondjela epaya lyuuyuni. Shika oshidhigu oshoka aadhengingonyo yalwe muuyuni na yo oye li wo methigathano okumona ompito yatya ngaaka okukondjela oshishani osho tuu shoka uuna ompito ye ya egulukile.Oshikwawo omudhengingonyo okuna okukala omudhani ngoka ha mbokisa ethimbo alihe opo a vule okupewa ompito ngaashi ndjika.Tashi ti nguka okuna okukala ha mbokisa naambokisi mboka yena omadhina moshimpungu shuudhano woongonyo muuyuni, ”

Eshongo enene ndyoka lya taalela aalongekidhi yuudhano mbuka oondyoka lyompumbwe yoshimaliwa oshoka MTC Sunshine Academy okwa taalelwa keshongo lyokugongela oshimaliwa shoodola oomiliona dhi vuleN$3.4 opo a vule okudhanitha uudhano mbuka woongonyo moNamibia mesiku lyotango lyomwedhi tuuka.

Kombinga ye Omupopiliko gwehangano ndyoka hali kwathele osikola yoongonyo ya Nestor Tobias kokutya MTC, Tim Ekandjo okwa ti otashi ka kutha oonkambadhala dhaantu oyendji oshowo omahangano ogendji opo oshimaliwa shoka shi vule okugongelwa omanga esiku 1 lyAuguste inaali adha. Na otashi kakala ohenda onene ngele olugodhi ndoka italu ka ya komeho molwashoka pwaana oshimaliwa okulu longekidha.

“Omutengenekothaneko gwoAcademy ogwa pwapo molwomalugodhi ngoka enongelo ndika lya li lya longekidha uule womumvo nguka. Onkene kombinga yaanduka otuna okuninga iikonga yokugongela oshimaliwa  oshowo okukundathana nOshikondo Shomaudhano  opo shi tu kwathele  mpoka tashi vulika.Onkene otandi kumike aaholi yuudhano woongonyo ayehe opo ya yambidhidhe iikonga yokugongela iimaliwa molwolugodhi nduka. Uudhano woongonyo moNamibia kauna elago ngaashi miilongo yilwe moka mbuka hawu mono iimaliwa mokukala nuuthemba woTiivi ndjoka hayi futilwa uuna omuntu wa hala okutala uudhnao mbuka pethimbo tawu  dhanwa nenge oku wu ulika konima shono wa dhanwa.Ndika olyo eshongo enene lya taalela aa unganeki yombokisa moNamibia, onkene olundji oyena oku ipyakidhila nokugongela iimaliwa opo ya wape okweeta uudhano woludhi nduka wu dhanenwe moNamibian,” Ekandjo a ti.

Tobias okuna einekelo kutya Ambunda ota ka shanga ondjokonona ompe shoo ye ta ka mona oshishani oshitiyali shuunyakwa mokudhenga oongonyo moNamibia meni lyomimvo dhili mbali.Uuna aadha shika, otwa dhiladhila okutula mumwe omapaya ngaka nomahangano ngaashi WBA, WBC, IBF nenge WBO opo ye a kale omumbokisi enyakwa lyuuyuni mondjundo ndjoka kohi ashike yepaya limwe.

 

1 COMMENT

LEAVE A REPLY

Please enter your comment!
Please enter your name here