Peter Ondume yomomufitu: Olugodhi lwopOmboloka

0
297
Peter Jungle Fighter

Iita yopOmboloka oya kondjelwe muNovomba 1980. Mbika ina yi yooloka kiita nomalugodhi omakwawo ngoka twa kondjo okukondjitha omutondi gwetu moshitopolwa moka twali hatu hingile iita. Eyooloko pokati kolugodhi nduka nomalugodhi galwe olili ashike mpoka kutya omanga nduka inaalu kondjwa otwa li tuna okuhomona okamba yaakwiita yomukolonyeki pOkongo. Iita mbika okwa li ya thanekwa tayi ningwa omuhanga kokutya aakwiita yeli lwopomathele 300 ya za komatanga ga yooloka oya li taya ka longela kumwe okuponokela okamba ya Kongo. Ihe oshiponokela shika osha ka ethiwa inaashi ningwa molwashoka aakwiita yomukolonyeki oya kala anuwa ihaa ya lalamo mokamba ethimbo lyuusiku. Omatanga ngoka ga li gena okukala oshitopolwa shiita mbika oga kwatelamo ndyoka lyokoombelewa dhoshitopolwa, etanga lyo Detachment A naandyoka lyo Far East Detachment. Ookommanda yomatanga oya li Rasarus Amuntele Shihepo gwo Detachment A na Philipus Shikuma Kamati gwoko Far East Detachment. Mbaka oyo ya li ookommanda mbali dhina oshinakugwanithwa shoku gandja omalombwelo miita mbyoka.Mbaka oya li taya kwathelwa kaakuluntu yalwe yopakwiita ya za koombelewa oonene dhoshitopolwa, ngaashi Martin Shalli, Festus Shikongo Nexale na Utoni Nujoma.

Omatanga gomuhanga ngaka oga li ga homatekwa oondjembo dhokuumba omortiira dhuunene womillimeta 82 dhili heyali, oondjembo mbali dhokuumba oomortiira dhuunene womillimeta 122 dho ndhika odha li dha tseyika nawa ogranda P, oondjembo omulongo dhoomortiira dhuunene woomilimeta omilongo hamano oshowo omatati gamwe omadhigu  miikuti. Etanga ndika olya tameke olweendo oku ya kolugodhi okuza poontanda dhoFar East Detachment pOhandabo konyala ookilometa omilongo 50 okuza poongamba dhAngola na Namibia. Oongamba otwe dhi taagulukile pOmboloka ndjoka yili kuumbangalantu wOkongo.Omanga etanga ndika inaali thigapo Ohandabo, kommanda  okwa tumu oondaadhi dhili omulongo opo dhi ka ndaadhe omudhingoloko gwaKongo okukonga uuyelele kombinga yomutondi. Pethimbo lyokundaadha kwetu otwa kundana kutya omutondi okwa li ena ontseyo kutya otatu thaneke okumuponokela.Onkene oya kala haya tembukamo mokamba yawo pethimbo lyuusiku.Ngiika oya kala haya holama mokati komikunda dhaakwashigwana nelalakano okutu ponokela  uuna andola tatu yamo momikunda ndhoka.

Konima sho twa tseyithile Ookomanda kombinga yuuyelele mboka twa gongelepo, opwa tokolwa kutya etanga na li topolwe moongundu dhili ne oontshona opo ndhika dhi kondjithe aakwiita yokoompadhi  shaampoka taya ka adhikwa mehala lyomalugodhi.Ngame onda li nda tulwa mongundu tayi komandwa ku hailwa Kalute na Oscar Hamukoto. Mbaka yaali oya li ookommanda dhomatanga gokundaadha naandyoka lyuunginia.Okuza kesiku ndyoka etanga lya topolwa moongundu ne otwa kala  tatu kongo omutondi opo tu mu homone.Omanga twali pOmboloka tatu kongo otwa kundana kutya omutondi okwa thika pOnamatadiva. Onkene Sackey nangame otwa tumwa opo tu ka tale kutya okuna akwiita ye thike peni oshowo okumu hekela moshilangela pOmboloka.

Otwa yi kOnamatadiva hoka twa adha omutondi ta teke omeya, otwa tegelele sigo mbaka otaya ende yuuka kutse opo ya ndhindhilike ekalepo lyetu.Omutondi okwa ende uukilila kutse tse notwa fadhukapo tuuka kOmboloka, yo aakwiita yomukolonyeki otaye tu landula oshoka oya li taya dhiladhila kutya ngiika otwe ya tila. Otwa endelele ngaashi tashi vulika opo  tu ka londodhe omatanga getu ga kale giilongekidhila olugodhi.Omatanga getu ogaadhika nale ga tega oshilangela momukunkulo gwondjila yokuza kOkandemwena   konyala ookilometa 25 kuumbugantu wOmboloka.Okuza kOnamatadiva otwa longitha ondjila yomiihwa ndjoka ya ya mwaandjoka yuuka kOmboloka –Okandemwena. Oshilangela osha li sha tulwa mooha dhondjila popepi nomatsakaneno goondjila ndhoka. Onkene sho twa thiki popepi nasho otwa matuka mokati kondjila tatu ningi twafa twa tila aakwiita yomutondi na otwa li andola tatu ya fadhukapo.Omutondi naye okwa matuka te tu tidha, naashi a thiki mokati koshilangela okwe ya mo iniilongekidha.Oyendji yaakwiita yomutondi oya li mokati kondjila omanga aashona yowala oyo yali kominkulo dhondjila.Aakwiita yetu oya li ya fula iilambo moka ya holama yo ishewe oyali ya siikila iilambo mbyoka niihwa iitalala.Otwa tegelele sigo oosho oyendji yomaakwiita yomutondi ya li popepi nawa nokuya yaha kolutu. Kommanda Kalute okwa lombwele omukwiita gumwe oye uumbe tango opo ihe atuhe tatu mu landula.Aakwiita yalwe oya li ya lombwelwa yaa umbe nando kakele ngele oya koneke kutya omutondi okwe tu mona.Ngame onda li popepi na Kommanda Kalute  ngoka a li popepi nomukwiita ngoka oye uumbu ondjembo yotango yo iita oya tameka . Tse otwa li tatu umbu eumbo lya shigakana naashika osha ngwangwaneke omutondi.Omutondi okwa li inaa vula oku tu yamukula mbala oshoka kali etu ilongekidhila ishewe kali a tegelela opo tu kale andola mpoka.Omutondi ngoka inaa sa nenge eehamekwa okwa fadhukapo oku ka pepelwa ombepo opo ishewe a tungululele omuhingo gwe gwokuhinga iita moku tu yamukula. Kommanda gwetu okwe tu lombwele opo tuuke komeho okuuka mpoka pwa zi aatondi yetu. Mokuninga ngaaka otwa ende kashona oshoka omutondi okwa kala te tu umbu, naashika oshetu thiminike opo tu holame manga. Otwa kala tatu umbathana uule wominute omilongo mbali  omanga inaatu shipondola okumweneka oondjembo dhomutondi. Otwa tsikile okuumba tuuka komeho naakwiita yomutondi ngiika mboka ya li yeehamekwa oya kala taye tu umbu, naashika osha eta eso lyomukwiita gwetu gumwe oshowo eehameko lya yalwe. Omanga twa li tatu kambadhala okutala mpoka tapu zi iikuti mbyoka omadhagadhaga gatatu goondjembo oge ya mehala lyolugodhi , tse notwa ka holama tweende tuuka uumbangalantu sigo otatu shuna mAngola. Omanga inaatu ya moAngola otwa fumvike manga Hailwa gwetu ngoka a dhipagelwa polugodhi nduka.

LEAVE A REPLY

Please enter your comment!
Please enter your name here