Rossouw uulikwa omudheuli gwaadhani yokonima

0
238

WINDHOEK – Omudheuli nale gwaadhani yokonima mospana yorugby yoBlue Bulls, Pieter Rossouw okwa ulikwa a ninge omudheuli gwaadhani yokonima mospana yaakuluntu muudhano mbuka moNamibia. Rossouw okwa ti okwa nyanyukilwa esimaenko ndika sho a pewa oshinakugwanithwa shika okulonga nospana yopashigwana ya Namibia unene sho tayi ka kuthombinga muudhano wekopi lyUuyuni lyoRugby nuumvo moEngelanda.

Olutu oluwiliki luudhano worugby moNamibia nenge Namibian Rugby Union (NRU) olwa koleke euliko lya Rossouw ongo omudheuli gwaadhani yokonima mospana yopashigwana yaNamibia yedhina ooWelwitschias, sho tayi ka dhana puudhano wekopi lyUuyuni lyo Rugby nuumvo. Okuulikwa kwa Rossouw okwa zi mekwatathano ewanawa nolyethimbo ele ndyoka NRU ya kala yi na nehangano lyo Blue Bulls Company .

“Ondina ohokwe onene na Namibia oshowo naantu ye, aadhani oyendji ya Namibia ondi ya shi oshowo aanambelewa yoshitopolwa shokudheula oyendji ondi ya shi, onkene shika onde shi tala ongo eshongo ewanawa notali hokitha.” Shika osho ontompolwa nenge oshitopolwa oshipe meithano lyandje muudhano worugby,’osho Rossouw a ulike.

Euvathano lyiilonga lya Rossouw nehangano lyoBlue Bulls Company otali ya pehulilo muKotoba, ndele pahapu dhe ehangano ndika lyo BBM olye mu etha opo a kwathele ospana yopashigwana ya Namibia omanga euvathano lye inaali thika pehulilo. Okwa pandula omugandji gwiilonga gwe nguka omolwashika.Rossouw okwa li wo omudhani mospana yopashigwana yorugby ya South Africa ndjoka hayi ithanwa Springbok.

“ The Blue Bulls oya li taya yambidhidha oku inyenga kwe , onkene ngele ando okwa li shika inaa ye shi ninga andola ina vula okuya okujoina Namibia mbala ngaaka.”

Omudhani muudhano omilongo 43-kohi yoSpringbok nguka okwa ti okwa nyanyukilwa ompito ndjika okulonga naadhani yokonima mboka Namibia ena. “Mospana ndjika omuna aadhani yena iipewa niitalendi, eshongo ndyoka lilipo olyo ashike okuya dheula nawa opo ye ye ponkatu yopombanda mpoka taya kala taya vulu okuthigathanapo na kehe omukondjithi gwawo unene tuu muudhano wekopi lyUuyuni lyoRugby moEngelanda nuumvo,” osho Rossouw  a gwedhapo.

Rossouw okwa ti okwa hala wo okumona Namibia ta sindana uudhano we wotango methigathano lyekopi lyuuyuni lyoRugby. “ Onda popya nale nomudheuli omukuluntu omupe Phil Davies ,tsenaye otuna omadhiladhilo ga faathana nondina etegameno okukalonga nawa pamwe naPhil,”

Rossouw ota ka joina ospana ya Namibia ongulohi yoSoondaha komeho getameko lyuudhano wo pambili mboka hau kwashilipalekwa ko Windhoek Draught taya ka dhana nospana yoko Russia. Omaudhano gomalolelo gaali na Russia otaga ka dhanenwa pokapale ka Hage Geingob moWindhoek momasiku 11 oshowo 18 ga Juli nuumvo.

 

LEAVE A REPLY

Please enter your comment!
Please enter your name here