Ta nyenyetele eleleo lyOndoolopa pOutapi

0
300

OUTAPI – Omunamimvo 44 okuuvite nayi sho anuwa ta ningwa nayi kElelo lyandoolopa ya Outapi sho moku landitha iinima ye pomatala.

Johanes Kalumbu gwokomukunda Ontokolo, moshikandjohogolo Outapi  okwa lombwele Kundana kutya nonando okwa landula omilandu adhihe oku mona ehala pomatala Elelo lyondoolopa Outapi olye mu landula ethimbo alihe.

“Ngame onda landula omilandu adhihe dhopambelewa okuninga eindilo lyokatala momatala mOutapi, nElelo lyondoolopa olyali lya pendje ehala ndyoka tandi futile sigo ongashingeyi,” Kalumbu a ti ngaaka.

Okwa ti nonando okwa pewa ehala ndyoka kElelo lyondoolopa onkee ngaa ta uhala ta tembudhwa nomashina ge oshoka aniwa ota ningile iinima yaamboka yeli popepi naye ontsi.

Kalumbu okwa tulwa mehala limwe naamboka ye li mo  taya landitha nokuhondja oohema omanga ye oha pangele nokulonga oonganku.

“ Mboka taya hondjo oohema ota ya nyenyeta kutya aniwa ota ningile oohema dhawo ontsi ndjoka tayi zi koongaku. Ngame onda tseyithila Elelo kutya aantu otaya nyenyeta  ashike ndika ina li hala okutaambako omanyenyeto gandje,” Kalumbu a ti ngaaka .

Okwa ti konima ashike yomasiku omashona omunambelewa melelo lyondoolopa ngoka ha longo niinakugwanithwa yOmatala, Elifas Lukileni okwe mu yamukula kutya anuwa nakale ta tembudha omashina ge uuna a hala oku longa opo kaa ningile aantu ontsi.

Lukileni  gwedhina lya tseyika nawa More sho a li a dhengelwa ku Kundana okwali a zimine kutya onkalo ya Kalumbu  oku yi shi nawa lela na ota ka popyako sha ashike uuna a pewa uuthemba komupopiliko gwelelo lyondoolopa yOutapi, Philipus Shililifa.

Shililifa ngoka woo naye ali a dhengelwa ku Kundana okwa li a tindi okupa Kundana uuthemba wokupopya na Lukileni ta ti kutya anuwa na popye nomukuluntu gwElelo lyondoolopa yOutapi Ananias Nashilongo.

Ashike Shililifa okwali a popi ethaneko inaali kolekwa kutya opuna omahala gamwe ngoka ha ga tulwa aantu pokathimbo ashike ina popya kutya Kalumbu ota ka pewa limwe lyomo ma hala ngoka.

Omupopiliko gwElelo ina popya odhindji oshoka aniwa okwali eli mefudho lyuuwehame .

Sho Kundana a ningi onkambadhala oku popya na Nashilongo, inashi pondola sha oshoka anuwa Elelo lyondoolopa ndjoka olina omutumba kombinga yomutengenekothaneko oshiwike shika ashihe.

Ashike Kalumbu okwa ti okwa hala Elelo li mu kwathele okumu tula pehala kaa lina omaudhigu oshoka omanyenyeto ngoka otaga yi ongeshefa moshipala.

“Ngame ondina egumbo, uunona wandje noshowo omukulukadhi mboka ndina oku tonatela esiku kehe  ashike ngashingeyi ongeshefa yandje itayi ende nawa oshoka itandi longo nomwenyo gwayela,” Kalumbu a ti ngaaka.

Kalumbu oha futu oshimaliwa shi vule pooN$100 kehe komweedhi kElelo lyondoolopa ndjoka ashike Elelo otali mu ihumbatele nayi.

LEAVE A REPLY

Please enter your comment!
Please enter your name here