Ombelewa yeenhauki oi na okupata

0
287

WINDHOEK – Molwa eshuno poshi lomwaalu weenhauki moNamibia wa li omayovi 20 000 ndele paife owa ninipala fiyo opomayovi 3 000, osha etifa etokolo opo ombelewa yaKoimmissina wOpombada wEenhauki koiwanayahangana i tembuke moNamibia.

Nande eedilaadilo lokupata ombelewa ei moNamibia la shiivifwa nale petameko lodula ei, Omukulunhu wombelewa yeenhauki koiwanayahangana moNamibia, Lawrence Mgbangson okwa koleka onghundana ei.

Nande Namibia a ulika okuha udila ombili edjemo lombelewa ei moshilongo no kwa yandja omatomhelo kombinga yaashi, novanambelewa vaNamibia va kangheka edilaadilo eli mekufombinga moyoongalele novanambelewa vombelewa yoiwanayahangana peenhele da yooloka pondje yoshilongo, ombelewa yakula yeenhauki koGeneva shaSwitserland oya tokola okupata ombelewa yeenhauki moNamibia.

Omaandaxa oshivike eshi Omundokotola Mgbangson, okwa lekela Omupedupresidente, Nickey Iyambo moWindhoek. Okwa lekela yoo Omuperesidente Geingob mEtitatu oshivike eshi.Okwa yelifa kutya, oshikondo shoikwameni yoshilongo niivelo yokeengaba doshilongo ponhele yepangelo, otashi  twikile nokuyakula eenhauki tashi kufa po yo oiyakulifo ya li hai longifwa meekamba deenhauki

Omundokotola Mgbangson ou a kala mombelewa yeenhauki moNamibia okudja 2010 okwa yelifa kutya nande moNamibia mu na eenhauki da dja moilongo ya yooloka nopondje yaAfrica, omolwa omwaalu weenhauki da pumbwa ekwafo koilongo ya yooloka mounyuni, oilongo nomahangano haa yandje eeshali oyu udite, oya longa sha wana mokuyambidida eenhauki  moNamibia.Ta weda po vali kutya, epangelo ole shi endifa nawa okushunifa eenhauki daAngola keumbo pamukalo weliyambo, oshilongo oshi na ombili noudemokoli owa uka komesho nosha fimaneka yo oufemba womunhu.

Omupedupresidente Omundokotola Nicky Iyambo okwa pandula ekwafo loiwanayahangana kuNamibia noshilongo otashi ka kendabala ngaashi tashi dulu mokuyandja omakwafo. Omundokotola Mgbangson,ota shuna keumbo koNigerina konima yeedula 25 a longa mombelewa yoiwanayahangana omo oshikakofimbo sheedula 23 domudo a kala  mombelewa yeenhauki koiwanayahangana. Oule weedula odo a kala moNamibia okudja muJanuali 2010 okwa holola ohokwe yaye moshilongo.

 

LEAVE A REPLY

Please enter your comment!
Please enter your name here