Oshikandjo Epale sha mona mwene

0
549

ONIIPA – Elelo lyopamuthigululwakalo lyaNdonga pamwe nOmukwaniilwa Immanuel Kauluma Elifa olyali lya ulike Kuku Anneli Sakaria ya Mbumba oye a ninge elenga enene moshikandjo Epale, konima sho sha kala ethimbo kaa shina ngoka teshi wilike. Kuku Mbumba okwali mwene gwomukunda Oyovu mOndonga.

Epale oshikandjo shuulenga  shili pokati kiikandjo  Ondangwa, Oshuushe,Oniimwandi,Ongula,Omulondo oshowo Oniiwe. Oshikandjo shaPale osha topolwa miitopolwa ihamano mbyono hayi ithanwa iipundi nomuna omikunda 102 ndhono adhihe dhina aawiliki yadho. Epale olya wilikwa ku Kuku Victoria Namene, Elifas Kambuta Shindondola, Johannes Amakali, Ester Amakali na Nekulu Hilma Elifas. Pethimbo manga oshikandjo shika sha kala shaana omuleli osha kala mewiliko lya Emiliha Kamati Mshaandja,Tangeni Amuthenu na Tonata Ngulu.

Kuku Mbumba okwa li uulikwa kOmukwaniilwa omumvo gwayi opo a ninge elenga enene moshikandjo shika konima sho a kala elenga eshona mOyovu. Okwali a longekidhilwa oshituthi shelangeko Olyomakaya ga piti shali sha ningilwa poombelewa dhoshikandjo pEpale mpoka. Poshituthilangeko opwali pwa kalwa ku mwene gwiita yemwene Omukwaniilwa Elifas, aakwanepangelo yoondondo dha yoolokathana mono mwa kwatelwa Nangolo Mbumba ngono eli omumwayina gwa Kuku Mbumba, Omupevi minista gweshunithopevi monkalo yoluhepo Aino Kapewangolo oshowo Omupevi minista gwiimaliwa Natangwe Iithete.

Osheendo shAaherero nasho oshali sheya shi kale pelangeko mpaka, opamwe woo naakwashigwana yaza komikunda nomikunda mOndonga. Opwali wo pwa kalwa kOmukwaniilwa Ndilimani Iipumbu naakalelipo yElelo lyopamuthigululwakalo lyUukwanyama.

Elenga enene Mbumba okwa valelwa mEpale momukunda Ondando mOniipa. Okwa hokanwa ku tate Vilio Williams no yena uunona utatu. Omulangekwa okwali a langekwa noku pewa oonkondo dhuutokolihapu, ye ta gana komeho gaakwashituthi noku leshelwa ooveta.

Kuku Mbumba pethimbo ta taambako oshinakugwanithwa shika okwali a pandula Omukwaniilwa pamwe nElelo alihe lyaNdonga sho lyemu inekele noku mu zaleka ombandi ndjoka onene. Okwa uvaneke ta ka longa oshilonga she noku gwanithapo ayihe. Okwa indile woo ya longele kumwe niikondo yepangelo mokukondjitha omahepeko guukashike kookantu, yo ya kalekepo ombili nelongelokumwe.

“Otandi indile tu longeleni kumwe nopolisi moku kondjitha iimbuluma mbyoka tayi londo esiku kehe , tse tu vule tuyi shunithe pevi, natu ituliimo miilonga yomomapya tu mone aluhe eteyo tali nyanyudha pehulilo, tandi indile woo elongitho lyomalovu oshowo iingangamithi li shonopekwe tse tu tunge oshilongo shetu shi kale shina ongushu,” Kuku Mbumba ta ti ngaaka.

Omulangekwa ngono aza mezimo lyaawa okwali a indile opo momikunda mwaa kale oontamanana nomalugodhi, ta ti ooyene yomikunda naya lele neifupipiko enene. Ta ti aanamukunda naya gunwe  yo ya kwathwe ethimbo kehe. Pandjokonona Oshikandjo Epale ohashi lelwa kaana yaawa oshowo kaatekulu yOomukwaniilwa mwene.

Elangeko2 Elangeko3

LEAVE A REPLY

Please enter your comment!
Please enter your name here