Aanandholongo ka yeshi aantu ya ekelwahi

0
286

OLUNO-Omukuluntu gwooNdholongo moNamibia, Raphael Tuhafeni Hamunyela okwa li a talelepo aanandholongo yopOluno mOndangwa nelalakano okuya ulukila kutya yo ina ya ekelwahi koshigwana nonando oye li mondjedhililo.

Hamunyela okwa li a talelepo aanandholongo Omaandaha oshiwike shika.

Nonando Hamunyela okwali a gandja ompito oyindji kaanandholongo oyo ya popye omaudhigu gawo okwa li eya lombwele yi isimaneke yo yene opo sho taya kashuna moshigwana otaya vulu okusimanekwa kaakwashigwana.

“ Sho wa tumwa muka osho wa monika ondjo kompangu. Ompangu oyo ashike hayi pangula yo oyo ashike hayi mono omuntu ondjo. Onkee otandi mu kumagidha opo mu itaale kutya omwayona eta mu shi taambako opo ashike mu vule okuhungwa omwenyo nokulundululilwa moombepo oombwaanawa,” Hamunyela ati .

Hamunyela okwa ti wo kutya aanandholongo yomOluno ngashingeyi oyena omikalo oshoka nuumvo okuza kuJanuali sigo omoMaandaha goshiwike shika  sho eya talelepo omwa lopotwa ashike iimbuluma yili ine.

Okwa ti shito andola iimbuluma mbyoka oya pitapo mpoka ashike ngashingeyi okwa nyanyukwa lela oshoka iimbuluma mondholongo oya shuna pevi.

Mondholongo mOluno omuna aanandholongo omathele 547 moka omilongo 27 aakiintu omanga 520 aalumentu.

Okweya tsu wo omukumo ya kale haya kuthombinga mootundi dhaanandholongo opo sho taya kashuna moshigwana nena oyena ontseyo nuunongo wa gwedhapo.

“ Oshinima oshikwawo uundjolowele, otuna okukala tatu mu kutha oombinzi dhikonaakonwe opo tu tseye kutya omuntu sho weyamo oweya mo nando okuli wuli nawa ngoye sho to zimo owuna uuvu wontumba. Nenge oweya mo nuuvu ndele to shuna nawo,” Kommufala gwoondholongo ati ngaaka.

Sho a gandja ompito kaanandholongo oya pandula anuwa sho eya okuya talela po taati kutya naamboka ya ninga mo oomvula dhi vulithe pomulongo ina ye shi mona nale.

Nonande Hamunyela okwa li a kunkulile aanandholongo yaa hokolole iinima kaa yi na omutse nandungu yamwe oyali ha hokolola kutya natango oyeli mo taya ningilwa omuyonena kaanambelewa, shoka eyonagulo lyuuthemba womuntu.

“Kommufala, tse muka otuli mo ta tuli ta tupi, noomwenyo dhetu otadhi luluma, oshoka natango ohatu dhengwa , tatu longithwa iilonga konkolonkolo noshowo okuningwa oka tongo ngele twe shi popi,” gumwe gwo maanandholongo a ti ngaaka.

Ya kwawo yamwe oya indile woo opo mu ye oongeleka dhomaitaalo gawo mondholongo oshoka kamuna. Ashike komufala gwawo okwati kena uudhigu naashoka ote shi ningi.

Omukwawo okwali woo a indile aapolisi ya dheulilwe okuhunga omwenyo oshoka yo ohaya kala ya hala okuhungwa omwenyo ashike mboka ya inekelelwa oshinakugwanithwa shoka iha ye ya mono.

Ashike Hamunyela okwa uvaneke ta ka landula mboka taya lundilwa kaanandholongo ngele omalundilo ngoka ogena uumbangi noshowo uushili.

LEAVE A REPLY

Please enter your comment!
Please enter your name here