AaNandjokwe ya yamukulwa

0
271

ONIIPA – Konima sho oshiwike sha ziko kwali kwa lopotwa aaniilonga moshipangelo shaNandjokwe yali inaaya mona oondjambi dhawo dhaJuni no ya li ya ningi oshigongi mono ya holola kutya ngele itaya pewa  oondjambi  dhawo kuya metitano lyoshiwike shayi nayo itaya yiko kiilonga, oondjambi dhawo osho dha futwa.

Oyendji oya kala nomaipulo ogendji oshoka shino oshali woo sha holoka konima yoomwedhi dha piti sho yali inaaya mona oondjambi dhawo sigo omwedhi gwa pititha omasiku omulongo, shoka sha fala  mpoka opo nokuli ya ninge ekanka lyopambili taya pula oondjambi dhawo kutya omolwashike dha kalako.

Omukuluntu gUundjolowele mOshikoto, Peter Angala kuyele oshiwike shika okwali eshi yelitha kutya aaniilonga yomoshipangelo shaNandjokwe mboka yali inaaya mona oondjambi dhawo dhaJuni omapulo gawo oga yamukulwa okuya pehulilo lyoshiwike sha ziko noya shuna kiilonga nale.

Angala okwa ti aaniilonga yomoshipangelo shika shi li mewiliko lyOngerki yaELCIN ohaya futwa kepangelo pauvathano lya shainwa kOngerki ndjika nepangelo. “ Ewiliko lyoshipangelo shika omwedhi gwaziko inali tuma eindilo mbala opo epangelo li longekidhe oondjambi dhaaniilonga dho dhi kale dhaya kooyene kuyele, naashika osho she etitha opo aaniilonga ya kale inaaya mona oondjambi dhawo mbala nokudhi ka teka,” Angala ta fatulula  ngaaka.

Yamwe yomaaniilonga oya holola kutya opwa kala owala hapu futwa yamwe poshikando omanga yamwe taya ka futwa ishewe esiku lya landula, shino taya hokolola kutya ina ye shi nyanyukilwa nande. Taya holola woo okuuva nayi kwawo molwewiliko lyoshipangelo shoka sho ihaali ya lombwele pethimbo opo ya kale yeshi kutya oondjambi dhawo ita dhi ya pethimbo kaa ya kale owala yeli metegelelo nande ya gandje ngaa ombili molwekateko ndika lyoondjambi dhawo.

“Nonande kashali ehalo lyetu opo tu kale tatu pula oondjambi dhetu oshali shetu thiminike molwaashoka naanambelewa yewiliko oya kala ya tinda okupopya natse oshowo ku yamukula omapulo getu, shino osho she etitha tu tokole twaa ha longe sigo oondjambi dhetu dha futwa, ashike otwa uva nayi noonkondo no nande oondjambi dhetu odha futwa ,” aaniilonga taya popi ndhoka.

 

 

LEAVE A REPLY

Please enter your comment!
Please enter your name here