Aanona yaali  yapile mondjugo

0
367

ONGWEDIVA- Omunona gwoomvula 12 okwa si ombaadhilila sho ondunda moka ali a lala ya kwata omundilo eta yi nomunona ngoka okwapilemo nokusilamo.

Omunona omukwawo ngoka a li namukwawo mondunda ndjoka sho ya tema omulilo okwa li a zimo ena omwenyo ihe okwa ka sila moshipangelo molwiilalo yomulilo.

Oshiningwanima shika otaku hokololwa shaningwa oshiwike shayi pomukunda Ombandaula moshikandjohogololo Outapi  moshitopolwa Omusati.

Okwa hokololwa kutya ondjugo ya yinakulu moka aanona yaali ya li ya lala naye oya li ya kwatwa komundilo omanga ya kotha eta ya pile mo.

Omukulupe gwomimvo omilongo 69 okwa li a lala naatekulu ye mondjugo moka woo mwali omushigo mpoka haputemwa omulilo omolwuutalala.

Otaku hokololwa kutya omukulupe okwa mono ekumbatha lya hwama konima sho uuvu uupyu womundilo wa li wa ninga owundji.Okwa kambadhala okuhilamo aatekulu ye mondjugo. Gumwe gwomaatekulu okwali a hupu omanga mukwawo a pilemo thiluthilu, ngoka ali a hupu okwa li a falwa koshipangeo shepangelo kOutapi hoka ali a manene oondjenda.

Oonakusa oyo Godfriend Johannes omumatyona gwomimvo hamano namukwawo Magano Ndapandula Kapatanenwa ena oomvula 12.

Opolisi yomoshitopolwa shaMusati oya ti oshiningwanima shika osha ningwa mokati kuusiku omanga omukulupe naatekulu yali mokati koomposi.

“Ashike elago enene omukulupe ina ningwa sha oshoka omundilo oye egu uvu tango na okwa li a ningi onkambadhala opo a hupithe aatekulu ye ashike ina pondola sha,” omupopiliko gwopolisi Lineekela Shikongo a ti ngaaka.

Omwedhi gwa zako omunona goomvula omugoyi okwa li a pile mondunda omanga ya lala nomuniilonga moshitopolwa omo tuu moka.

 

LEAVE A REPLY

Please enter your comment!
Please enter your name here