Davies nelunduluko mospana yoWelwitschias nuumvo

0
236

WINDHOEK-Omudheuli omupe gwospana yopashigwana yoRugby, Phil Davies okwa tseyitha omathaneko noondjodhi dhe kombinga yaashoka a hala ospana ndjika yi adhe monakuyiwa. Omathaneko ngaka Davies okwe ga popi omanga ospana ndjika yi li meilongekidho okukadhana uudhano wayo uutiyali nospana tayi talelepo okuza koRussia ehulilo shiwike ndika. Davies okwa ndjandjukununa omathaneko ge gomonakuyiwa nkene a hala ospana yopashigwana yi longe oshowo oondjodhi dhe okutula omuthika guudhano woRugby moNamibia pombanda.

Davies okwi itaala kutya Namibia ota ka ulika uudhano uuwanawa nuumvo pethimbo lyuudhano wethigathano lyekopi lyUuyuni lyoRugby moEngland. Omukumo nguka Davies okwe gu mono konima sho ospana ndjika kohi yewiliko lye ya dhana nokudhenga ospana yoRugby yopashigwana ya Russia muudhano wayo wotango womomaudhano gaali ehulilo shiwike lyapiti. Davies okuna einekelo neitaalo kutya ospana ndjika otayi ka dhenga ishewe ndjoka ya Russia Olyomakaya ndjika sho oospana ndhika tadhi tsakanene pokapale ka Hage Geingob moVenduka.

“Otwa kala twa taalelwa komashongo ogendji momathimbo gapiti  ndele nando ongaaka otwa li wo twa tyapula omasindano oshowo eyokomeho lishi ku tumbulwa oomwedhi dhapiti, nelalakano lyetu enene olyo, okutungila keyokomeho ndika pethimbo tatu ilongekidhile okuya kuudhano wekopi lyUuyuni. Otwa longa oshindji unene mokudheula ospana okuukilila aadhani aagundjuka  mospana, niilonga yuudhiginini yetu oya holoka mesindano lyetu sho twa dhenge ospana ya Russia Olyomakaya gayi,” osho omukwashigwana gwaWelsh a popi poshigongi shiikundaneki moshilandopangelo oshiwike shika.

“Okuuka komeho  omalalakan getu ogo okutula mumwe ospana yetu kokutya otatu yi tula aadhani mboka haya dhanene megumbo oshowo mboka haya dhanene koospana dhokiilongo yopondje, eta tu longo ihe nuudhiginini osigo twaadha omuthika mpoka atuhe tuuvite ombili kutya ngashingeyi otuli ospana tayi longo nawa muukumwe,”

Davies okwiitaala nokena omalimbililo kutya ospana ye otayi ka endulula esindano ndyoka yo ya mwene Olyomakaya gaziko , sho tayi dhana ishewe nospana ya Russia Olyomakaya ngaka muudhano uutiyali wopambili pokati koospana ndhika pokapale ka Hage Geingob moVenduka. Uudhano mbuka owa kwashilipalekwa koWindhoek Draught na ohau ithanwa Windhoek Draught Test Series.Muudhano wOlyomakaya ga yi Namibia okwa sindana uudhano mboka nookoola 39-19. “Tse katuna omaipulo kombinga yokweehama oshoka pethimbo ndika aadhani yandje ayehe oye li nawa yo ishewe ayehe oyuuvite nawa no yiilongekidha okudhana nawa ngaashi sha tegelelwa. Otu shishi kutya itashi kala oshipu oshoka Russia ota ka dhana ngaashi tashi vulika opo a sindane , tse kombinga yetu natse otwi ilongekidha okumu yamukula, neinekelo lyetu oondyoka kutya tu mone esindano etiyali muudhano mbuka,”

Olutu oluwiliki lwo rugby mo Namibia nenge [Namibia Rugby Union (NRU)] olwa tseyitha kutya aanasikola mboka taya ka kala ya zala omizalo dhawo dhosikola  nenge otrakshuta dhosikola otaya ka pitikilwa meni lyokapale inaa ya futa sha. Iipundi yawo otayi kala mbyoka yili kopaviliona ndjoka yaana omunzile ishewe mbaka oya tegelelwa ya kale ya kuutumba pamwe. NRU okwa kumike aanasikola opo ya ninge omaplakata ngoka taga ulike eyambidhidho lyawo kospana ya Namibia. Oshowo oya pumbwa okuulukila oshigwana kutya yo oya za kosikola yini. Osikola ndjoka ya shanga epalakata lyayo pamadhiladhilo gayo yene oyina ompito okusindana ondjambi yooN$2 000-00 oshowo omatanga gatatu gorugby..

Omusindani otaka pewa ondjambi ye konima sho omudhani dhingi muudhano a pewa epapa lye.

Caption: Phil Davies jpg –  A tala monakuyiwa…Omudheuli omupe gwoWelwitschias Phil Davies ota ti okuwete onakuyiwa ombwaanawa yuudhano worugby moNamibia.

LEAVE A REPLY

Please enter your comment!
Please enter your name here